தூத்துக்குடி கே.வி.எஸ். பள்ளியில் 39-வது ஆண்டு விளையாட்டு விழா

தூத்துக்குடி கே.வி.எஸ். மெட்ரிகுலேஷன் மேல்நிலைப் பள்ளியின் 39-வது ஆண்டு விளையாட்டு விழாப் போட்டிகள், தூத்துக்குடி புனித மேரி கல்லூரி விளையாட்டு மைதானத்தில் நடைபெற்றது.

விழாவிற்குப் பள்ளித் தலைவர் கே.எஸ்.எஸ்.ஏ. திராவிட மணி தலைமை தாங்கினார். பள்ளித் தலைமை ஆசிரியை மெலிண்டா சூசன் தாமஸ் வரவேற்புரையாற்றி, கடந்த ஆண்டின் விளையாட்டுப் போட்டிகள் குறித்த ஆண்டறிக்கையை வாசித்தார்.

நிகழ்ச்சியில் சிறப்பு விருந்தினராகக் கலந்துகொண்ட வ.உ.சி. துறைமுக விளையாட்டுக்கழகச் செயலாளர் எம்.ஆர். தமிழ்ச்செல்வன், சமாதானப் புறாக்களைப் பறக்கவிட்டு, மாணவ-மாணவிகளின் அணிவகுப்பு மரியாதையை ஏற்றுக்கொண்டு விளையாட்டுப் போட்டிகளை முறைப்படி தொடங்கி வைத்தார்.

இவ்விளையாட்டுப் போட்டியில் மாணவ-மாணவிகள் நான்கு அணிகளாகப் பிரிக்கப்பட்டு ஓட்டப்பந்தயம், வழுக்கு மரம் ஏறுதல் உள்ளிட்ட 14 வகையான போட்டிகள் நடத்தப்பட்டன. போட்டிகளில் அதிக அளவிலான தங்கம், வெள்ளி, வெண்கலப் பதக்கங்களைக் கைப்பற்றி, மொத்தம் 105 புள்ளிகளுடன் முதலிடம் பிடித்த அணிக்குக் கே.வி.எஸ். பள்ளிச் சுழற்கேடயம் வழங்கப்பட்டது.

வெற்றி பெற்ற அணிக்குச் சுழற்கேடயத்தைப் பள்ளித் தலைவர் கே.எஸ்.எஸ்.ஏ. திராவிட மணி, செயலாளர் டி.ஆர். தமிழரசு, பொருளாளர் டி.ஆர். பாலமுருகன் ஆகியோர் இணைந்து வழங்கினர். மேலும், தனிநபர் போட்டிகளில் முதல் மூன்று இடங்களைப் பிடித்த மாணவ-மாணவிகளுக்குத் தங்கம், வெள்ளி, வெண்கலப் பதக்கங்களும் சான்றிதழ்களும் வழங்கப்பட்டன. விழா முடிவில் பள்ளித் துணைத் தலைமை ஆசிரியை கிறிஸ்டோமெல் மேத்தா நன்றி கூறினார்.