ஜவுளிக் கடையில் ரூ.2 லட்சம் திருட்டு: பெண் உள்பட 2பேருக்கு போலீஸ் வலைவீச்சு

தூத்துக்குடி மாவட்டம் கயத்தாறு அகிலாண்டபுரம் இந்திரா காலனியைச் சேர்ந்த மகாராஜன் (32), கயத்தாறு பகுதியில் ஜவுளிக்கடை நடத்தி வருகிறார். இவருடைய கடைக்கு வந்த அடையாளம் தெரியாத ஒரு ஆணும் பெண்ணும், தங்களது வீட்டுத் திருமணத்திற்காகத் துணி எடுப்பதாகக் கூறி ரூ.27 ஆயிரத்திற்கு ஜவுளி ரகங்களைத் தேர்வு செய்துள்ளனர். பின்னர், பணத்தைக் கொடுத்துவிட்டுத் துணிகளை எடுத்துக்கொள்வதாகக் கூறிவிட்டு அவர்கள் கடையை விட்டு வெளியேறியுள்ளனர்.

இதனைத் தொடர்ந்து, கடையில் இருந்த பணப்பெட்டியை உரிமையாளர் மகாராஜன் சரிபார்த்தபோது, அதிலிருந்த ரூ.2 லட்சம் ரொக்கப் பணம் திருடப்பட்டிருப்பது தெரியவந்தது. இது குறித்து மகாராஜன் அளித்த புகாரின் அடிப்படையில், கயத்தாறு காவல் நிலைய காவல் துறையினர் வழக்குப் பதிவு செய்து, ஜவுளிக்கடையில் வாடிக்கையாளர்கள் போல நடித்துப் பணத்தைத் திருடிச் சென்ற இருவரையும் தேடி விசாரணை நடத்தி வருகின்றனர்.