பைக் விபத்தில் வழக்கறிஞர் மகன் உட்பட 2 பேர் பரிதாப சாவு

தூத்துக்குடியில் பைக் விபத்தில் வழக்கறிஞர் மகன் உட்பட 2 பேர் பரிதாபமாக உயிரிழந்த சம்பவம் அப்பகுதியில் சோகத்தை ஏற்படுத்தியுள்ளது.

தூத்துக்குடி கிழக்கு கடற்கரை சாலை புளியமரத்து அரசடி கிராமத்தை சேர்ந்தவர் மூக்காண்டி மகன் முருகன் (53). இவர் இன்று மாலை 4 மணியளவில் தனது வீட்டில் இருந்து தூத்துக்குடிக்கு மோட்டார் பைக்கில் வந்து கொண்டிருந்தார். அப்போது வெள்ளப்பட்டியில் இருந்து தூத்துக்குடி நோக்கி வந்த வழக்கறிஞர் இக்னேஷியஸ் மகன் பகன் (27) முருகனுக்கு பின்னால் பைக்கில் வந்து கொண்டிருந்தார்.

அப்போது திடீரென முருகன் தனது பைக்கை வலது பக்கமாக திரும்பியபோது பின்னால் வந்த பகன் பைக் முருகன் பைக் மீது மோதியதில் இருவரும் தூக்கி வீசப்பட்டு அதே இடத்தில் பரிதாபமாக இறந்தனர். இந்த சம்பவம் குறித்து தகவல் அறிந்த தாளமுத்து நகர் காவல் நிலைய இன்ஸ்பெக்டர் பொறுப்பு ஹேமலதா சம்பவ இடத்திற்கு சென்று இரண்டு பேர் பிணத்தை கைப்பற்றி தூத்துக்குடி அரசு மருத்துவமனைக்கு பிரேத‌ பரிசோதனைக்காக அனுப்பி வைத்தார். மேலும் இது சம்பந்தமாக வழக்கு பதிவு செய்து விசாரணை நடத்தி வருகிறார். இந்த சம்பவம் அப்பகுதியில் சோகத்தை ஏற்படுத்தியுள்ளது.