தூத்துக்குடி மாநகர் முழுவதும் சுகாதாரப் பணிகள்: தேசிய மக்கள் உரிமைகள் பாதுகாப்பு கழகம் வலியுறுத்தல்!

தூத்துக்குடி மாநகராட்சி முழுவதும் சுகாதாரப்பணிகள் முறையாக செய்வதை உறுதி செய்ய வேண்டும் என்று தேசிய மக்கள் உரிமைகள் பாதுகாப்பு கழகம் வலியுறுத்தியுள்ளது.

இது தொடர்பாக மாவட்ட செயலாளர் அ.செல்வகுமார் மாநகராட்சி ஆணையருக்கு விடுத்துள்ள மனுவில்,"தூத்துக்குடி மாநகராட்சி தூய்மை பணிகளில் Ourland Engineering Works நிறுவனம் மெத்தனமாக செயல்படுகின்றதா? குப்பைகள் சேகரிக்கும் பணிகளை முழுமையாக கவனிக்க இயலவில்லையா?

தூத்துக்குடி மாநகராட்சி பகுதிகளில் தேங்கியுள்ள குப்பைகளை மாநகராட்சி சுகாதார அலுவலரிடம் புகார் அளித்து தான் தீர்வு காண வேண்டுமெனில் Ourland Engineering Works நிர்வாகம் செயலற்ற நிலையில் உள்ளதா? சுகாதார அலுவலர் வந்து தான் பிரச்சனைகளை சரிசெய்ய வேண்டும் எனில் ஒப்பந்தம் எதற்கு? ஒப்பந்தாரர் எதற்கு? 

Ourland Engineering Works Pvt Ltd., நிறுவனத்தின் மேற்பார்வையாளர்களுக்கு சரியான நேரத்தில் ஊதியம் வழங்குவதில் இருக்கும் பிரச்சனை தான் மேற்படி பிரச்சனைக்கு காரணமா? ஊழியர்களிடம் கேட்டால் பணியை மட்டும் சரியான நேரத்தில் செய்ய வேண்டும் ஊதியத்தை அவர்கள் நினைக்கும் நேரத்தில் வழங்குவார்களா என ஆதங்கப்படுகின்றனர்.

பொதுமக்கள் நலனுக்காக தான் ஒப்பந்தம் என்பது ஒப்பந்த நிறுவனத்துக்கு புரியவில்லையா? பிரதி மாதம் 5-ம் தேதிக்குள் ஊதியம் செலுத்தப்பட வேண்டும் என்ற சுழலில் குறிப்பிட்ட தேதிக்குள் ஊதியம் வழங்காமல் காலம் தாழ்த்தி வழங்கப்படுவது ஏன்? ஏற்கனவே ஊதியம் வழங்குதல் பிரச்சனையில் மாநகராட்சி எச்சரிக்கை செய்தும் மீண்டும் அதே தவறு நடப்பது எதனால்? இவையெல்லாம் மாநகராட்சிக்கு தெரிந்தும் தெரியாதது போல் நடந்து கொள்கின்றதா? இது தொடர்பாக உரிய விசாரணை வேண்டும் என்று வலியுறுத்தியுள்ளார்.