பத்திர பதிவுத்துறையில் போலி ஆவணங்கள் பதிவை தடுக்க புதிய நடைமுறை அமல்

பத்திர பதிவு துறையில் போலி ஆவணங்கள் பதிவை தடுக்க புதிய நடைமுறையாக அமல்படுத்தப்பட்டு உள்ளது.

இதுகுறித்து சென்னை பதிவுத்துறை தலைவர், அனைத்து துணை பதிவுத்துறை தலைவர்கள், மாவட்ட பதிவாளர்கள், சார்பதிவாளர்களுக்கு ஒரு சுற்றறிக்கை அனுப்பி உள்ளார். அதில் "தமிழ்நாடு ஆவண எழுத்தர் உரிம விதிகள் 1982 விதி 15-ல் பத்திரபதிவுக்கு வரும் பொதுமக்கள் அறிந்து கொள்ள ஏதுவாக ஒவ்வொரு பதிவு அலுவலகத்திலும் அதனுடன் இணைக்கப்பட்டு உள்ள ஆவண எழுத்தர்களின் பட்டியல் அறிவிப்ப பலகையில் வைக்கப்பட வேண்டும் என்று தெரிவிக்கப்பட்டு உள்ளது. 

ஆனால் ஆவண எழுத்தர்களின் பட்டியல் பல பதிவு அலுவலகங்களில் முறையாக வைக்கப்படுவது இல்லை. அறிவிப்பு பலகையில் உள்ள ஆவண எழுத்தர்களின் விவரங்களும் மேம்படுத்தப்படாமல் உள்ளது.

ஆகையால் போலி ஆவணங்கள் பதிவு தொடர்பான விசாரணையின் இறுதியில் போலி ஆவணம் என்று முடிவு செய்யும்போது, அதனை தயாரித்தவர் யார் என்ற விவரத்தை சரியாக அறியவும், எழுதி தந்தவருக்கும், இந்த போலி ஆவணம் தயாரிப்பில் ஏதாவது தொடர்பு இருந்தால் அவர்கள் மீது உரிய குற்றவியல் நடவடிக்கை மேற்கொள்ள ஏதுவாக இருக்கும் என்பதால், ஆவணத்தின் இறுதி பக்கத்தில் ஆவணத்தை தயார் செய்த ஆவண எழுத்தர் அல்லது வக்கீலின் பெயர், உரிம எண், கட்டாயம் குறிப்பிடப்பட்டு இருக்க வேண்டும். 

அதன் அருகில் அவருடைய பாஸ்போர்ட் அளவிலான புகைப்படத்தை ஸ்கேன் செய்யப்பட்ட பிம்பம் அதிலேயே அச்சுப்பிரதியில் வரும் வகையில் அச்சுப்பிரதி எடுத்து அதன் அருகில் கையொப்பம் இடவேண்டும் என்ற நடைமுறை கொண்டு வரப்பட்டு உள்ளது. அதன் தொடர்ச்சியாக பதிவுஅலுவலகங்களில், அந்த அலுவலகத்துடன் இணைக்கப்பட்டு உள்ள ஆவண எழுத்தர்களின் விவரங்களை, அதாவது ஆவண எழுத்தர் பெயர், உரிம எண், செல்போன் எண் அடங்கிய விவரங்களை ஆவண எழுத்தர்களின் புகைப்படத்துடன் இணைத்து பொதுமக்கள் அறியும் வகையில் அறிவிப்பு பலகையில் வைக்க வேண்டும். இவ்வாறு அறிக்கையில் கூறப்பட்டு உள்ளது.