தூத்துக்குடி மாவட்டம், சாகுபுரம் டிசிடபிள்யூ நிறுவனம் மற்றும் சென்னை எஸ்சி அகர்வால் அறக்கட்டளை இணைந்து நடத்திய சிறப்பு நலத்திட்ட உதவிகள் வழங்கும் விழாவில், 64 மாற்றுத்திறனாளிகளுக்குச் செயற்கை கால்கள், சக்கர நாற்காலிகள் உள்ளிட்ட பல்வேறு உதவி உபகரணங்கள் வழங்கப்பட்டன.
சாகுபுரம் டிசிடபிள்யூ நிறுவன வளாகத்தில் நடைபெற்ற இந்நிகழ்ச்சியில், 64 மாற்றுத்திறனாளி பயனாளிகளுக்குச் செயற்கை கால்கள், செயற்கை கைகள், சக்கர நாற்காலிகள் மற்றும் இதர மாற்றுத்திறனாளி உதவி உபகரணங்களை டிசிடபிள்யூ நிறுவனத்தின் மூத்த செயல் துணைத் தலைவர் ஜி.சீனிவாசன் வழங்கிப் பாராட்டினார்.
இந்நிகழ்ச்சிக்கான ஏற்பாடுகளை என்.வி.சம்பத் மற்றும் நத்தகுளத்தைச் சேர்ந்த ஜான் வில்லியம்ஸ் ஆகியோர் முன்னெடுத்தனர். விழாவில் மாவட்ட நல அலுவலர் காமாட்சி கலந்துகொண்டு பயனாளிகளுக்குச் சிறப்பு வாழ்த்துரை வழங்கினார்.
மேலும், டிசிடபிள்யூ நிறுவனத்தின் துணைத் தலைவர் எஸ்.சுரேஷ், மூத்த பொது மேலாளர்கள், பொது மேலாளர்கள் மற்றும் தொழிற்சங்க நிர்வாகிகள் பலர் கலந்துகொண்டு தங்களது ஆதரவைத் தெரிவித்தனர். மாற்றுத்திறனாளிகளின் நலன் மற்றும் வாழ்வாதார வலுவூட்டலுக்கான அர்ப்பணிப்பின் ஒரு பகுதியாக, டிசிடபிள்யூ நிறுவனத்தின் மக்கள் தொடர்புத் துறை இந்நிகழ்ச்சியைச் சிறப்பாக ஏற்பாடு செய்திருந்தது.