தூத்துக்குடி தாளமுத்துநகர் அம்பேத்கர் நகரைச் சேர்ந்தவர் மாரிமுத்து (55). இவர் தூத்துக்குடி மாநகராட்சியில் ஒப்பந்த அடிப்படையில் தூய்மைப் பணியாளராக வேலை பார்த்து வந்தார்.
இந்நிலையில், மாரிமுத்து தனது மனைவியின் ஏ.டி.எம். கார்டைப் பயன்படுத்திப் பணம் எடுத்ததாகக் கூறப்படுகிறது. இதைக் கண்டித்த அவரது மகன் விக்னேஷ்குமார் (21), மாரிமுத்துவைத் கீழே தள்ளிவிட்டுச் சென்றதாகத் தெரிகிறது.
இதனைத் தொடர்ந்து, மறுநாள் காலையில் மாரிமுத்து அப்பகுதியில் மயங்கிய நிலையில் கிடந்துள்ளார். இதனைக் கண்ட குடும்பத்தினர் மற்றும் அக்கம் பக்கத்தினர் அவரை மீட்டுத் தூத்துக்குடி அரசு மருத்துவக் கல்லூரி மருத்துவமனையில் சிகிச்சைக்காக அனுமதித்தனர். எனினும், அங்குச் சிகிச்சை பலனின்றி அவர் பரிதாபமாக உயிரிழந்தார்.
இச்சம்பவம் குறித்துத் தாளமுத்துநகர் காவல் நிலையப் போலீசார் வழக்குப் பதிவு செய்து, மாரிமுத்துவின் மரணத்திற்கு மகன் தள்ளிவிட்டதில் ஏற்பட்ட காயங்கள் காரணமா அல்லது வேறு ஏதேனும் உடல்நலப் பிரச்சனையா என்பது குறித்துத் தீவிர விசாரணை நடத்தி வருகின்றனர்.