யாருக்கு ஓட்டு என்பதை வெளிப்படுத்தினால் சிறை : தேர்தல் ஆணையம் கடும் எச்சரிக்கை!

தமிழக சட்டமன்றத் தேர்தலுக்கான வாக்குப்பதிவு இன்று (வியாழக்கிழமை) காலை 7 மணிக்குத் தொடங்கியுள்ள நிலையில், வாக்கு ரகசியத்தை மீறுபவர்களுக்குச் சிறை தண்டனை விதிக்கப்படும் எனத் தேர்தல் ஆணையம் அதிரடியாக அறிவித்துள்ளது.

மக்கள் பிரதிநிதித்துவச் சட்டத்தின் 128-வது பிரிவின்படி, ஒரு வாக்காளர் தான் யாருக்கு வாக்களித்தேன் என்பதைப் பகிரங்கமாக வெளிப்படுத்துவது குற்றமாகும். குறிப்பாக: வாக்குப்பதிவு இயந்திரத்தில் குறிப்பிட்ட சின்னத்திற்கு வாக்களிப்பதைப் புகைப்படம் அல்லது வீடியோ எடுத்து சமூக வலைதளங்களில் (WhatsApp Status, Facebook, Instagram) பதிவிடுவது சட்டப்படி குற்றம். இத்தகைய விதிமீறலில் ஈடுபடுவோருக்கு 3 மாதங்கள் சிறை தண்டனை அல்லது அபராதம் அல்லது இரண்டுமே சேர்த்து விதிக்கப்படும் எனத் தேர்தல் ஆணையம் எச்சரித்துள்ளது.

தமிழகம் முழுவதும் 75,064 வாக்குச்சாவடிகள் அமைக்கப்பட்டுள்ளன. 1.06 லட்சம் வாக்குப்பதிவு இயந்திரங்கள் பயன்பாட்டில் உள்ளன. வாக்குப்பதிவு மாலை 6 மணி வரை நடைபெறும். 6 மணிக்குள் வரிசையில் நிற்பவர்களுக்குத் டோக்கன் வழங்கப்பட்டு அவர்கள் வாக்களிக்க அனுமதிக்கப்படுவர். தேர்தல் பணியில் 3.60 லட்சம் அரசு ஊழியர்களும், பாதுகாப்புப் பணியில் 300 கம்பெனி துணை ராணுவத்தினர் மற்றும் சுமார் 84,000 போலீசாரும் ஈடுபட்டுள்ளனர்.

கள்ள ஓட்டு மற்றும் டெண்டர் வாக்கு: ஒரு வாக்காளரின் வாக்கை யாராவது கள்ள ஓட்டாகப் பதிவு செய்திருந்தால், அந்த வாக்காளர் தனது அடையாளத்தை உறுதிப்படுத்தி 'டெண்டர் வாக்கு' (Tendered Vote) அளிக்கலாம். இது வாக்குச்சீட்டு முறையில் பெறப்பட்டுத் தனிக் கவரில் சீல் வைக்கப்படும். ஜனநாயகத் திருவிழாவின் முக்கிய நிகழ்வான இந்தத் தேர்தலில் அனைவரும் அச்சமின்றி வந்து வாக்களிக்குமாறு தேர்தல் ஆணையம் வேண்டுகோள் விடுத்துள்ளது.