பள்ளி வேன் மீது கார் மோதி விபத்து: 3 பெண்கள் உட்பட 4 பேர் காயம்!

» செய்திகள் - விளையாட்டு » மாவட்ட செய்தி (தூத்துக்குடி)

பள்ளி வேன் மீது கார் மோதி விபத்து: 3 பெண்கள் உட்பட 4 பேர் காயம்!

வியாழன் 25, ஜூன் 2026 8:21:43 AM (IST)

கோவில்பட்டி அருகே புளியங்குளம் விலக்கு பகுதியில் தனியார் பள்ளி மாணவர்களை ஏற்றிச் சென்ற வேன் மீது கார் மோதி விபத்துக்குள்ளானதில், காரில் பயணித்த 4 பேர் காயமடைந்தனர்.

தூத்துக்குடி மாவட்டம் கோவில்பட்டி அருகே உள்ள இழுப்பையூரணி தாமஸ் நகரைச் சேர்ந்தவர் அன்பழகன் (66). இவர் தனது மனைவி சாந்தி (58) மற்றும் அதே பகுதியைச் சேர்ந்த சுபா (32), ஜெயந்தி (40) ஆகியோருடன் தென்காசி மாவட்டம் கலிங்கப்பட்டியில் நடைபெற்ற திருமண நிகழ்ச்சி ஒன்றில் கலந்து கொண்டார்.

நிகழ்ச்சி முடிந்து அனைவரும் காரில் மீண்டும் சொந்த ஊருக்குத் திரும்பிக் கொண்டிருந்தனர். காரை அன்பழகன் ஓட்டி வந்துள்ளார். நேற்று மாலை 5.30 மணியளவில் கோவில்பட்டி அருகே புளியங்குளம் விலக்கு பகுதியில் கார் வந்துகொண்டிருந்தது. அப்போது, அய்யனேரியிலிருந்து புளியங்குளத்திற்குத் தனியார் பள்ளி மாணவர்களை ஏற்றிச் சென்ற வேன் மீது எதிர்பாராதவிதமாகக் கார் மோதி விபத்துக்குள்ளானது.

இந்த பயங்கர விபத்தில் காரின் முன்பகுதி பலத்த சேதமடைந்ததுடன், காரில் பயணம் செய்த அன்பழகன், சாந்தி, சுபா, ஜெயந்தி ஆகிய 4 பேரும் உடல் காயம் அடைந்தனர். விபத்து குறித்துத் தகவல் அறிந்த கோவில்பட்டி மேற்கு காவல் நிலைய போலீசார் சம்பவ இடத்திற்கு விரைந்து சென்று, காயமடைந்த 4 பேரையும் மீட்டு சிகிச்சைக்காகக் கோவில்பட்டி அரசு மருத்துவமனையில் சேர்த்தனர்.

அங்கு ஜெயந்தி முதலுதவி சிகிச்சை பெற்றுக் கொண்டு வீடு திரும்பிய நிலையில், அன்பழகன், சாந்தி, சுபா ஆகிய 3 பேரும் தொடர்ந்து மருத்துவமனையில் தங்கிச் சிகிச்சை பெற்று வருகின்றனர். இவ்விபத்து குறித்துக் கோவில்பட்டி மேற்கு போலீசார் வழக்குப் பதிவு செய்து தீவிர விசாரணை நடத்தி வருகின்றனர்.

மக்கள் கருத்து

மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.

பெயர்: கருத்து: