சிறுமியின் கட்டாயத் திருமணம் தடுத்து நிறுத்தம்!

தூத்துக்குடியில் 17 வயது சிறுமிக்குக் கட்டாயப்படுத்தி நடத்தப்பட இருந்த சட்டவிரோதத் திருமணத்தைச் சமூக நலத்துறையினர் மற்றும் மகளிர் போலீசார் அதிரடியாகச் சென்று தடுத்து நிறுத்தியுள்ளனர்.

தூத்துக்குடி முத்தையாபுரம் பகுதியைச் சேர்ந்த 17 வயது சிறுமிக்கும், 20 வயது வாலிபருக்கும் திருமணம் செய்து வைக்க இருவீட்டுப் பெற்றோர்களும் முடிவு செய்திருந்தனர். இவர்களது திருமணம் நேற்று புதன்கிழமை நடைபெறுவதாக இருந்தது. இதற்காகப் பத்திரிகைகள் அச்சடிக்கப்பட்டு உறவினர்களுக்கு விநியோகிக்கப்பட்டிருந்தன. திருமண நாளான நேற்று மணமகன் இல்லத்தில் திருமண ஏற்பாடுகள் மிகவும் மும்முரமாக நடைபெற்று வந்தன.

இந்நிலையில், சட்டப்பூர்வ திருமண வயது எட்டாத 17 வயது சிறுமிக்குப் பெற்றோர் கட்டாயப்படுத்தித் திருமணம் நடத்தத் திட்டமிட்டிருப்பது குறித்துச் சமூக நலத்துறைக்கு ரகசியப் புகார் ஒன்று சென்றது.

இப்புகாரின் அடிப்படையில், சமூக நலத்துறை குழந்தைகள் நலக் குழுவினர் மற்றும் தூத்துக்குடி அனைத்து மகளிர் காவல் நிலைய போலீசார் சம்பவ இடத்திற்கு விரைந்து சென்று சிறுமியின் பெற்றோரிடம் தீவிர விசாரணை நடத்தினர். விசாரணையில், அச்சிறுமிக்குக் கட்டாயத் திருமணம் நடைபெற இருந்தது உறுதி செய்யப்பட்டது.

இதனைத் தொடர்ந்து, சிறுமி மற்றும் மணமகனின் பெற்றோரை அழைத்து அதிகாரிகள் விரிவான பேச்சுவார்த்தை நடத்தினர். பெண்களுக்கான சட்டப்பூர்வ திருமண வயதான 18 வயது நிறைவடைவதற்கு முன்பாகத் திருமணம் செய்து வைப்பது சட்டப்படி கடுமையான குற்றம் என்பதை எடுத்துரைத்த அதிகாரிகள், சிறுமிக்கு 18 வயது முடிந்த பின்பே திருமணத்தை நடத்த வேண்டும் என அறிவுறுத்தினர்.

அதிகாரிகளின் அறிவுரையை ஏற்றுக்கொண்ட இருவீட்டாரும் நேற்று நடைபெற இருந்த திருமணத்தை நிறுத்திக் கொள்வதாக அதிகாரப்பூர்வமாக உறுதி அளித்தனர். அதிகாரிகளின் இந்தத் துரித நடவடிக்கையால் 17 வயது சிறுமியின் திருமணம் நேற்று உரிய நேரத்தில் நிறுத்தப்பட்டது. இச்சம்பவம் அப்பகுதியில் பெரும் பரபரப்பை ஏற்படுத்தியுள்ளது.