மண்ணுக்குள் புதைத்த 221 மதுபாட்டில்கள் பறிமுதல்: தாய், மகன் சிக்கினர்!

தூத்துக்குடி மாவட்டம் கயத்தாறு தாலுகா செட்டிக்குறிச்சி முத்துகிருஷ்ணன் காலனி பகுதியில், சட்டவிரோதமாக மதுபாட்டில்கள் பதுக்கி வைத்து விற்பனை செய்யப்படுவதாகக் கயத்தாறு போலீசாருக்கு ரகசியத் தகவல் கிடைத்தது. தகவலின் அடிப்படையில், கயத்தாறு உதவி ஆய்வாளர் காசிநாதன் மற்றும் போலீசார் இன்று அப்பகுதியில் அதிரடி சோதனை நடத்தினர். 

அப்போது, அங்குள்ள ஒரு வீட்டின் அருகே மண்ணுக்குள் மறைத்து புதைத்து வைக்கப்பட்டிருந்த 221 அரசு மதுபாட்டில்களை போலீசார் கண்டுபிடித்து பறிமுதல் செய்தனர். இது தொடர்பாகச் செட்டிக்குறிச்சி முத்துகிருஷ்ணன் காலனியைச் சேர்ந்த சுடலைமணியின் மனைவி முத்துலட்சுமி (35) மற்றும் அவரது மகன் இசக்கிப்பாண்டி (19) ஆகிய இருவரையும் போலீசார் பிடித்து காவல் நிலையம் அழைத்துச் சென்றனர். அவர்கள் மீது வழக்குப் பதிவு செய்த போலீசார், கள்ளச்சந்தையில் விற்பனைக்காக மதுபாட்டில்களைப் பதுக்கியது குறித்து தீவிர விசாரணை நடத்தி வருகின்றனர்.