காட்டுப்பன்றிகளைக் கட்டுப்படுத்த துப்பாக்கி ஏந்திய வனக்காவலர்கள்: அதிமுக வேட்பாளர் அதிரடி வாக்குறுதி!

விளாத்திகுளம் சட்டமன்றத் தொகுதி அதிமுக வேட்பாளர் சத்யா, இன்று தனது தொகுதிக்கு உட்பட்ட பல்வேறு கிராமங்களில் வீதி வீதியாகச் சென்று இரட்டை இலை சின்னத்திற்கு வாக்கு சேகரித்தார்.

வடக்கு முத்துலாபுரம், சுப்புலாபுரம், வீரப்பட்டி உள்ளிட்ட பகுதிகளில் பிரசாரம் மேற்கொண்ட சத்யா, அப்பகுதி விவசாயிகளின் நீண்டகாலக் கோரிக்கைகள் குறித்துப் பேசுகையில்: காட்டுப்பன்றித் தொல்லை: "கடந்த ஐந்தாண்டுகளாகக் காட்டுப்பன்றிகளால் மக்காச்சோளம், உளுந்து உள்ளிட்ட பயிர்கள் கடுமையாகச் சேதமடைந்து வருகின்றன. அதிமுக ஆட்சி அமைந்தவுடன், காட்டுப்பன்றிகளைக் கட்டுப்படுத்த வனத்துறை சார்பில் துப்பாக்கி ஏந்திய வனக்காவலர்கள் இப்பகுதிக்கு நியமிக்கப்படுவார்கள்."

வைப்பாறு - அச்சன்கோவில் நதிநீர் இணைப்புத் திட்டம் அதிமுக ஆட்சி வந்தவுடன் போர்க்கால அடிப்படையில் செயல்படுத்தப்படும். இருக்கன்குடி நீர் தேக்கத்திலிருந்து நாகலாபுரம் வரை துண்டிக்கப்பட்டுள்ள கால்வாய் மீண்டும் சீரமைக்கப்பட்டு, விவசாயிகளுக்குத் தடையின்றித் தண்ணீர் வழங்க நடவடிக்கை எடுக்கப்படும் என உறுதி அளித்தார்.

பிரசாரத்தின் போது, புதூர் அதிமுக மேற்கு ஒன்றியச் செயலாளர் தனவதி, கிழக்கு ஒன்றியச் செயலாளர் தனஞ்செயன், தகவல் தொழில்நுட்பப் பிரிவு மாவட்டத் தலைவர் மோகன், கரிசல் பூமி வரதராஜன் மற்றும் பாரதிய ஜனதா கட்சி உள்ளிட்ட கூட்டணிக் கட்சி நிர்வாகிகள் திரளாகக் கலந்துகொண்டனர்.