நெல்லை, தூத்துக்குடி, மாவட்டங்களில் 11-ஆம்தேதி வரை கனமழைக்கு வாய்ப்பு

தூத்துக்குடி, நெல்லை உள்பட பல்வேறு மாவட்டங்களி்ல வருகிற 11-ந் தேதி வரையில் கனமழை பெய்ய வாய்ப்பு இருப்பதாக சென்னை வானிலை ஆய்வு மையம் தெரிவித்து உள்ளது.

வங்க கடலில் நிலவும் கீழடுக்கு சுழற்சி காரணமாக தமிழகத்தின் பெரும்பாலான பகுதிகளில் பரவலாக மழை பெய்து வருகிறது. நேற்று காலை 8.30 மணியுடன் நிறைவு பெற்ற 24 மணி நேரத்தில், அதிகபட்சமாக கடலூர் மாவட்டம் வடகுத்து பகுதியில் அதிகபட்சமாக 13 செ.மீட்டர் மழை பதிவானது. நாமக்கல் மாவட்டம் ராசிபுரத்தில் 12 செ.மீட்டர், சேலத்தில் 11 செ.மீட்டர், புதுக்கோட்டை மாவட்டம் திருமயம், ஆலங்குடியில் தலா 9 செ.மீட்டர் மழை பதிவானது.

தற்போது, தெற்கு ஆந்திரா- வடதமிழக கடலோர பகுதிளை ஒட்டிய மத்திய மேற்கு-தென்மேற்கு வங்க கடல் பகுதிகளின் மேல் ஒரு வளிமண்டல கீழடுக்கு சுழற்சி நிலவுகிறது. இதன் காரணமாக, நீலகிரி, கோவை, திருப்பூர், தேனி, திண்டுக்கல், தென்காசி, நெல்லை, விருதுநகர், கன்னியாகுமரி, ஈரோடு, தஞ்சாவூர், திருவாரூர், மயிலாடுதுறை, நாகை, புதுக்கோட்டை ஆகிய மாவட்டங்களில் இன்று (திங்கட்கிழமை) கனமழைக்கு வாய்ப்பு உள்ளது.

நாளை (செவ்வாய்கிழமை) நீலகிரி, கோவை, திருப்பூர், தேனி, திண்டுக்கல், தென்காசி, நெல்லை. கன்னியாகுமரி, ஈரோடு, கரூர், விருதுநகர், தூத்துக்குடி, ராமநாதபுரம், புதுக்கோட்டை, தஞ்சாவூர், நாகை, திருவாரூர், மயிலாடுதுறை ஆகிய மாவட்டங்களில் கனமழைக்கு வாய்ப்பு உள்ளது.

வருகிற 9-ந் தேதி நீலகிரி, கோவை, திருப்பூர், தேனி, திண்டுக்கல், நெல்லை, தென்காசி, கன்னியாகுமரி, மதுரை, விருதுநகர், ராமநாதபுரம், தூத்துக்குடி, புதுக்கோட்டை, சிவகங்கை, மயிலாடுதுறை, தஞ்சாவூர், திருவாரூர், நாகை, கடலூர் ஆகிய மாவட்டங்களிலும், புதுச்சேரி, காரைக்கால் பகுதிகளிலும் கனமழைக்கு வாய்ப்பு உள்ளது.

வருகிற 10-ந் தேதி நீலகிரி, கோவை, திருப்பூர், தேனி, திண்டுக்கல், நெல்லை, தென்காசி, விருதுநகர், கன்னியாகுமரி, தூத்துக்குடி, ராமநாதபுரம் மாவட்டங்களில் கனமழைக்கு வாய்ப்பு உள்ளது. நீலகிரி, கோவை, திருப்பூர், தேனி, திண்டுக்கல், தென்காசி, நெல்லை, விருதுநகர், கன்னியாகுமரி மாவட்டங்களில் வருகிற 11-ந் தேதி கனமழைக்கு வாய்ப்பு இருப்பதாக வானிலை ஆய்வு மையம் தெரிவித்து உள்ளது.