தாய்லாந்தின் தெற்குப் பகுதியில் உள்ள பிரபல சுற்றுலாத் தீவான புகெட்டின் பாடோங் பகுதியில் அமைந்துள்ள நான்கு மாடி வணிகக் கட்டிடத்தில் இன்று (நவ. 16) அதிகாலை ஏற்பட்ட பயங்கரத் தீ விபத்தில் 11 பேர் பரிதாபமாக உயிரிழந்தனர்; மேலும் 36 பேர் காயமடைந்துள்ளனர்.
பாடோங் கடற்கரைக்கு அருகிலுள்ள பாங் முவாங் சாய் கோர் சாலையில் வாகன வாடகை நிறுவனம், விற்பனை அலுவலகங்கள் மற்றும் தங்கும் விடுதிகள் செயல்படும் 4 மாடிக் கட்டிடம் அமைந்துள்ளது. இங்கு இன்று அதிகாலை 3 மணியளவில் திடீரெனத் தீப்பற்றியது.
கட்டிடத்தின் தரைத்தளத்தில் சுமார் 100 இருசக்கர வாகனங்கள் நிறுத்தப்பட்டிருந்ததால், அவற்றிலிருந்த எரிபொருள், ரப்பர் டயர்கள் மற்றும் பிளாஸ்டிக் பாகங்கள் தீப்பிடித்து எரிந்தன. இதனால் தீ மளமளவென அருகிலுள்ள மேலும் 5 வணிகக் கட்டிடங்களுக்கும் பரவத் தொடங்கியது.
தீ விபத்து ஏற்பட்டதும் கட்டிடத்திற்குள் இருந்தவர்கள் உயிர் தப்பிக்க மாடிக்கு ஓடினர். ஆனால், கட்டிடம் முழுவதும் கரும்புகை சூழ்ந்ததால் அவர்களால் வெளியேற முடியாமல் தவித்தனர். தகவலறிந்து விரைந்து வந்த தீயணைப்புப் படையினர் சுமார் 2 மணி நேரம் கடுமையாகப் போராடித் தீயைக் கட்டுக்குள் கொண்டு வந்தனர்.
கடும் புகை மூட்டத்தால் ஏற்பட்ட மூச்சுத் திணறல் காரணமாகவே பெரும்பாலான உயிரிழப்புகள் நிகழ்ந்துள்ளதாக முதற்கட்ட விசாரணையில் தெரியவந்துள்ளது. உயிரிழந்த 11 பேரில் தாய்லாந்து மற்றும் மியான்மர் நாட்டவர்கள் அடங்குவர் என்றும், இதில் வெளிநாட்டுச் சுற்றுலாப் பயணிகள் யாரும் பாதிக்கப்படவில்லை என்றும் அதிகாரிகள் உறுதிப்படுத்தியுள்ளனர்.
காயமடைந்த 36 பேரும் மீட்கப்பட்டு அருகிலுள்ள மருத்துவமனைகளில் சிகிச்சைக்காக அனுமதிக்கப்பட்டுள்ளனர். கட்டிடத்திற்கு அருகிலுள்ள மின்கம்பத்தில் ஏற்பட்ட மின்கசிவு காரணமாக இந்தத் தீ விபத்து ஏற்பட்டிருக்கலாம் என அதிகாரிகள் சந்தேகிக்கின்றனர். இது குறித்துத் தீவிர விசாரணை நடத்தப்பட்டு வருகிறது.
முன்னதாக, கடந்த ஜூலை மாதம் பாங்காக்கில் உள்ள மதுபானக் கூடத்தில் ஏற்பட்ட தீ விபத்தில் 40 பேர் உயிரிழந்ததும், 2009-ஆம் ஆண்டு புத்தாண்டு கொண்டாட்டத்தின்போது பாங்காக் இரவு விடுதியில் ஏற்பட்ட தீ விபத்தில் 67 பேர் உயிரிழந்ததும் குறிப்பிடத்தக்கது.

