திருச்செந்தூர் சூரசம்ஹார விழா நேரலை ஒளிபரப்பில் பேச்சாளர் ஒருவர் "விஜய்க்கு அரோகரா, அமைச்சர் ரமேஷுக்கு அரோகரா" எனக் கூறியது மிகவும் தவறானது மற்றும் கண்டிக்கத்தக்கது என 'வீ த லீடர்ஸ்' அமைப்பின் தலைவர் அண்ணாமலை தெரிவித்துள்ளார்.
திருச்செந்தூர் சூரசம்ஹார விழா நேரலை ஒளிபரப்பில் பேச்சாளர் ஒருவர் முதல்வர் விஜய் மற்றும் அமைச்சர் ரமேஷ் ஆகியோருக்கு 'அரோகரா' எனக் கூறியது கண்டிக்கத்தக்கது என 'வீ த லீடர்ஸ்' அமைப்பின் தலைவர் அண்ணாமலை தெரிவித்துள்ளார்.
சென்னை விமான நிலையத்தில் இன்று (நவ. 16) செய்தியாளர்களைச் சந்தித்த அண்ணாமலை கூறியதாவது: "திருச்செந்தூரில் நடைபெற்ற சூரசம்ஹார விழாவில் பங்கேற்க இந்து சமய அறநிலையத்துறை சார்பாகப் பேச்சாளர்கள் அனுப்பி வைக்கப்பட்டனர். அவர்களில் வேல்முருகன் என்பவர் நேரலை ஒளிபரப்பில் முருகப்பெருமானுக்கு 'அரோகரா' என்று சொல்வது போல, 'விஜய்க்கு அரோகரா, அறநிலையத்துறை அமைச்சர் ரமேஷுக்கு அரோகரா' என்று பேசியிருப்பது வன்மையாகக் கண்டிக்கத்தக்கது.
இதுபோன்ற செயல் முதல் முறையாக நடந்துள்ளது; இது மிகவும் தவறானது. இதில் சாதாரணமாக மன்னிப்பு கேட்டுக் கடந்து விட முடியாது. இதனை முதலமைச்சர் விஜய் கண்டிப்பது மட்டுமல்லாமல், இனி இதுபோன்று நடக்காமல் தடுக்க வேண்டும்; அமைச்சர் ரமேஷும் இதற்கு உரிய நடவடிக்கை எடுக்க வேண்டும்."
"கள்ளக்குறிச்சி மாவட்ட ஆட்சியருக்குத் தவெக எம்.எல்.ஏ. அருள் விக்னேஷ் சர்ச்சைக்குரிய குறுஞ்செய்தி அனுப்பியதாகக் கூறப்படும் புகாரைத் தேசிய மகளிர் ஆணையம் விசாரணைக்கு எடுத்துக் கொண்டு, 7 நாட்களுக்குள் டிஜிபி அறிக்கை சமர்ப்பிக்க வேண்டும் என உத்தரவிட்டிருப்பது வரவேற்கத்தக்கது.
இந்த விவகாரத்தில் மாவட்ட ஆட்சியர் அரசு நிகழ்ச்சிகளைத் தவிர்த்து வருவதும், இதுகுறித்து முதலமைச்சர், டிஜிபி மற்றும் ஐ.ஏ.எஸ். அதிகாரிகள் சங்கம் என யாருமே பேசாமல் இருப்பதும் பல்வேறு கேள்விகளை எழுப்புகிறது. தேசிய மகளிர் ஆணையத்தின் நோட்டீஸுக்கு உரிய பதிலளிப்பார்களா என்பதைப் பொறுத்திருந்து பார்க்க வேண்டும். ஒரு புதிய அரசின் செயல்பாடுகளை மதிப்பிட 365 நாட்கள் காத்திருக்க வேண்டும் என்றாலும், கடந்த 6 மாத காலத்தில் தமிழகத்தில் சட்டம்-ஒழுங்கு சிறப்பாக இல்லை."
"மேகதாது அணை கட்டுவதற்கு கர்நாடக அரசுக்கு எவ்வித உரிமையும் இல்லை. நீர் பங்கீடு குறித்து கர்நாடக அரசு உச்ச நீதிமன்ற வழிகாட்டுதலைப் பின்பற்ற வேண்டும்; இதில் மத்திய அரசும் தலையிட வேண்டும். காவிரிப் படுகையில் உள்ள 51 தாலுகாக்களை வறட்சிப் பகுதியாக அறிவித்து, தண்ணீரைத் தேக்கி வைக்க கர்நாடக முதலமைச்சர் சிவக்குமார் முயற்சிக்கிறார்.
எனவே, தமிழக முதலமைச்சர் விஜய் வெறுமனே புத்தக வெளியீட்டு விழாவிற்கு மட்டும் சென்றேன் என்று கூறாமல், மேகதாது விவகாரத்தில் தமிழகத்தின் உரிமையை மீட்கக் கர்நாடக முதலமைச்சர் மற்றும் காங்கிரஸ் தலைவர்களிடம் பேசி உரிய நடவடிக்கை எடுக்க வேண்டும்.
"'வீ த லீடர்ஸ்' நிர்வாகிகள் தற்போது களப்பணியில் சமூக சேவையாற்றி வருகின்றனர். மழைக்காலம் முடிந்தபின் தொடர்ந்து பொதுக்கூட்டங்கள் நடத்த உள்ளோம். நான் அரசியல் பேசுகிறேன், ஆனால் 'வீ த லீடர்ஸ்' தற்போதைக்கு அரசியல் கட்சி அல்ல; வருங்காலத்தில் அரசியல் கட்சியாக மாறும்போது போராட்டங்களும் ஆர்ப்பாட்டங்களும் நடத்தப்படும். தவெக அரசின் ஓராண்டு நிறைவுக்குப் பிறகு, ஒவ்வொரு துறையிலும் அவர்கள் செய்தது என்ன என்பது குறித்து எங்கள் அமைப்பின் சார்பில் வெள்ளை அறிக்கை வெளியிடப்படும்" இவ்வாறு அண்ணாமலை தெரிவித்தார்.

