ராஜஸ்தான் மாநிலம் ஜெய்ப்பூரில் நடைபெற்ற மிஸ் யுனிவர்ஸ் இந்தியா 2026 அழகிப் போட்டியில் கேரளாவைச் சேர்ந்த 19 வயதான காசியா லிஸ் மேஜோ வெற்றி பெற்று 'மிஸ் யுனிவர்ஸ் இந்தியா 2026' பட்டத்தைக் கைப்பற்றினார்.
ஜெய்ப்பூரில் உள்ள ஜீ ஸ்டுடியோஸில் நடைபெற்ற பிரம்மாண்ட இறுதிப் போட்டியில் இந்தியா முழுவதிலும் இருந்து 52 பேர் போட்டியாளர்களாகப் பங்கேற்றனர். இந்தியாவின் முதல் மிஸ் யுனிவர்ஸ் சுஷ்மிதா சென், முன்னாள் மிஸ் யுனிவர்ஸ் இந்தியா ஊர்வசி ரவுத்தேலா, 2024-ஆம் ஆண்டின் மிஸ் யுனிவர்ஸ் இந்தியா ரியா சிங்ஹா, சுற்றுச்சூழல் ஆர்வலரும் திரைப்படத் தயாரிப்பாளருமான பிரக்யா கபூர் மற்றும் செலினா ஜெய்ட்லி ஆகியோர் நடுவர்களாகச் செயல்பட்டனர்.
கடந்த ஆண்டின் மிஸ் யுனிவர்ஸ் இந்தியா மணிகா விஸ்வகர்மா, வெற்றி மகுடத்தைக் காசியா லிஸ் மேஜோவிற்குச் சூட்டினார்.
முதல் இடம் (மிஸ் யுனிவர்ஸ் இந்தியா 2026): காசியா லிஸ் மேஜோ (கேரளா)
இரண்டாம் இடம் (மிஸ் இன்டர்நேஷனல் இந்தியா 2026): வைஷ்ணவி கணேஷ் (தமிழ்நாடு)
மூன்றாம் இடம்: அனுஸ்ரீ சதாவ்லேகர்
நான்காம் இடம்: தேஜஸ்வினி ஸ்ரீவஸ்தவா
ஐந்தாம் இடம்: அனுபா வசிஷ்ட் சவுத்ரி
கேரளா மாநிலம் மாவேலிக்கரையைச் சேர்ந்த காசியா லிஸ் மேஜோ, ஐக்கிய அரபு அமீரகத்தின் அபுதாபியில் வளர்ந்து பள்ளிப்படிப்பை முடித்தவர். தற்போது சட்டப்படிப்பு பயின்று வரும் இவர், ஏற்கனவே 'மிஸ் டீன் இன்டர்நேஷனல்' போட்டியில் இரண்டாம் இடம் பிடித்தவர் என்பது குறிப்பிடத்தக்கது.
பட்ட வென்ற காசியா லிஸ் மேஜோ, வரும் நவம்பர் மாதம் போர்ட்டோ ரிகோவில் நடைபெறவுள்ள 75-வது உலகளாவிய மிஸ் யுனிவர்ஸ் அழகிப் போட்டியில் இந்தியா சார்பில் பங்கேற்கவுள்ளார்.