தரிசனக் கட்டணத்தை ரத்து செய்ய வலியுறுத்தல் : தூத்துக்குடியில் இந்து முன்னணி ஆர்ப்பாட்டம்!

தமிழகத்தில் இந்து சமய அறநிலையத் துறை கட்டுப்பாட்டில் உள்ள திருக்கோவில்களில் பக்தர்கள் வழிபாட்டிற்கான தரிசனக் கட்டணத்தை முற்றிலும் ரத்து செய்ய வலியுறுத்தி, இந்து முன்னணி சார்பில் தூத்துக்குடியில் மாபெரும் கண்டன ஆர்ப்பாட்டம் நடைபெற்றது.

தூத்துக்குடி டூவிபுரம் 5-வது தெரு முதன்மைச் சாலை சந்திப்பில் நடைபெற்ற இந்த ஆர்ப்பாட்டத்தில், தமிழகத்தில் உள்ள அனைத்து ஆலயங்களிலும் தரிசனக் கட்டண முறையை அரசு உடனடியாகத் தடை செய்ய வேண்டும், இந்து சமய அறநிலையத் துறை கோவில்கள் மூலம் வரும் வருமானத்தை முழுமையாக இந்து கோவில்களின் திருப்பணிகளுக்கு மட்டுமே பயன்படுத்த வேண்டும் மற்றும் பழனி கோவிலுக்குச் சொந்தமான நிலத்தைப் போலிப் பத்திரம் மூலம் ஆக்கிரமித்த குற்றவாளிகள் மற்றும் அதற்கு உடந்தையாக இருந்த அதிகாரிகள் மீது கடுமையான நடவடிக்கை எடுத்து கோவில் சொத்துகளைப் பாதுகாக்க வேண்டும் உள்ளிட்ட பல்வேறு கோரிக்கைகளை வலியுறுத்தித் தமிழக அரசுக்கு எதிராகக் கோஷங்கள் எழுப்பப்பட்டன.

இந்து முன்னணி மாநகர மாவட்டத் தலைவர் இசக்கிமுத்துக்குமார் தலைமையில் நடைபெற்ற இந்த ஆர்ப்பாட்டத்தில் சிறப்புப் பேச்சாளர் மாயவன் முத்துச்சாமி, மாநகர மாவட்டத் துணைத் தலைவர் ஆதிநாத ஆழ்வார், ஆர்.எஸ்.எஸ் ஜில்லா சங்கச்சாலக் சீதாராமன், பாஜக மாவட்டத் துணைத் தலைவர் சிவராமன், இந்து அன்னையர் முன்னணி மாநகரத் தலைவி உமையவள்ளி, மத்திய அரசு வழக்கறிஞர் இசக்கி லெட்சுமி ஆகியோர் பங்கேற்றனர் மற்றும் பலர் திரளாகக் கலந்துகொண்டனர்.