முதலமைச்சர் விஜய் பிறந்தநாள் விழா: விளையாட்டு வீரர்களுக்கு உபகரணங்கள் விநியோகம்!

தமிழக முதலமைச்சர் விஜய் பிறந்த நாளை முன்னிட்டுத் தூத்துக்குடி தெற்கு மாவட்டத் தவெக சார்பில் குரும்பூரில் விளையாட்டு வீரர்களுக்குப் பல்வேறு விளையாட்டு உபகரணங்கள் வழங்கும் நலத்திட்ட நிகழ்ச்சி நடைபெற்றது!

தமிழக முதலமைச்சர் விஜய் பிறந்த நாள் விழாவையொட்டித் தூத்துக்குடி தெற்கு மாவட்டத் தவெக சார்பில் குரும்பூர் சுற்றுவட்டாரப் பகுதியைச் சேர்ந்த இளைஞர்கள் மற்றும் விளையாட்டு வீரர்களுக்கு விளையாட்டு உபகரணங்கள் வழங்கும் நிகழ்ச்சி சிறப்பாக நடைபெற்றது. இந்நிகழ்ச்சிக்குத் தூத்துக்குடி மாவட்ட தேர்தல் கண்காணிப்புத் தலைவர் முருகன் தலைமை வகித்து, கிரிக்கெட் பேட், வாலிபால், ஸ்டெம்ப் உள்ளிட்ட விளையாட்டுப் பொருட்களை வீரர்களுக்கு வழங்கினார்.

விளையாட்டு உபகரணங்களை வழங்கி மாவட்ட தேர்தல் கண்காணிப்புத் தலைவர் முருகன் பேசுகையில், "தற்போது பொறுப்பேற்றுள்ள தவெக அரசு மக்கள் நலன் சார்ந்து சிறப்பாகச் செயல்பட்டு வருகின்றது. இதே போன்ற உழைப்புடனும் அர்ப்பணிப்புடனும் வரவிருக்கும் உள்ளாட்சித் தேர்தலிலும் முழுமையான வெற்றி பெற நாம் அனைவரும் ஒன்றிணைந்து களப்பணியாற்ற வேண்டும். வாக்குக்குப் பணம் கொடுக்காமல், மக்களின் தூய்மையான ஆதரவுடன் மட்டுமே நாம் ஆட்சிக்கு வந்துள்ளோம்" எனக் குறிப்பிட்டார்.

தொடர்ந்து போதைப்பொருள் தடுப்பு குறித்துப் பேசிய அவர், "இளைஞர்களின் எதிர்காலத்தைக் கெடுக்கும் கஞ்சா போன்ற போதைப்பொருட்களை இன்னும் 6 மாத காலத்திற்குள் தமிழகத்தில் இருந்தே முழுமையாக விரட்டி அடிப்போம். இந்த உன்னதமான முயற்சிக்கு இளைய சமுதாயத்தினரின் பேராதரவு மிகவும் தேவையாகும். உங்கள் பகுதிகளில் கஞ்சா அல்லது இதர போதைப்பொருள் நடமாட்டம் இருப்பது தெரியவந்தால், எதற்கும் பயப்படாமல் உடனடியாகக் காவல் நிலையத்தில் புகார் தெரிவிக்க வேண்டும்" என்று வலியுறுத்தினார்.

இந்நிகழ்ச்சியில் தவெக தெற்கு மாவட்ட இணைச் செயலாளர் விஜய் ஆனந்த், ரோஷன், பாபு, ஜெனிஸ்டன், ஆசிரியர் லிவிங்ஸ்டன், லெபனான், புருனோ, விவின்குமார், பாஸ்கர், ரீகன், ஐஸ் குமார், சந்தனம் உட்பட கட்சி நிர்வாகிகள் மற்றும் உள்ளூர் பொதுமக்கள் பலர் திரளாகக் கலந்து கொண்டனர்.