ஓமனில் உயிரிழந்த தூத்துக்குடி மாலுமியின் மனைவிக்கு அரசு வேலை: அமைச்சர் ஸ்ரீநாத் நடவடிக்கை!

ஓமன் நாட்டில் கப்பலில் பணியாற்றியபோது உயிரிழந்த தூத்துக்குடியைச் சேர்ந்த மாலுமி நிஷாந்தின் மனைவிக்கு, மீன்வளம் மற்றும் மீனவர் நலத்துறை அமைச்சரின் பரிந்துரையின் பேரில் தமிழ்நாடு மீன்வளர்ச்சிக் கழகத்தில் தற்காலிக இளநிலை உதவியாளர் பணி வழங்கப்பட்டுள்ளது.

தூத்துக்குடி குரூஸ்புரத்தைச் சேர்ந்தவர் மாலுமி நிஷாந்த். இவர் ஓமன் கார்மோஸ் கடற்பரப்பில் உள்ள கப்பல் ஒன்றில் பணியாற்றி வந்தபோது, அத்தியாவசிய மற்றும் அவசர மருத்துவ உதவிகள் உரிய நேரத்தில் கிடைக்காத காரணத்தால் கடந்த ஒரு வாரத்திற்கு முன்பு கப்பலிலேயே பரிதாபமாக உயிரிழந்தார்.

நிஷாந்தின் உடல் இதுவரை தமிழகத்திற்கு வந்து சேராத நிலையில், அவரது மனைவி சராபின் தனது பத்து மாத ஆண் குழந்தை மற்றும் மூன்று வயது பெண் குழந்தையுடன் வாழ்வாதாரத்தை இழந்து தவித்து வந்தார். தங்களது குடும்ப சூழ்நிலையைக் கருத்தில் கொண்டு தனக்கு ஏதேனும் ஒரு அரசுப் பணி வாய்ப்பு வழங்க வேண்டும் என்று மீன்வளம் மற்றும் மீனவர் நலத்துறை அமைச்சர் ஸ்ரீநாத்திடம் ஜூன் 19-ஆம் தேதி சராபின் கோரிக்கை மனு அளித்திருந்தார்.

அவரது மனுவை ஏற்றுக்கொண்ட அமைச்சர் ஸ்ரீநாத், உடனடியாக அதனைப் பரிசீலனை செய்யப் பரிந்துரைத்தார். அந்தப் பரிந்துரையின் அடிப்படையில், சராபின் குடும்பத்தின் வாழ்வாதாரத்தை உறுதிப்படுத்தும் நோக்கில் கருணை அடிப்படையில் மனு உடனடியாகப் பரிசீலிக்கப்பட்டது.

அதனைத் தொடர்ந்து, சராபினுக்குத் தமிழ்நாடு மீன்வளர்ச்சிக் கழகத்தின் தூத்துக்குடி மேலாளர் அலுவலகத்தில் வெளிமுகமை நிறுவனம் (Outsourcing) வழியாகத் தொகுப்பு ஊதிய அடிப்படையில், தற்காலிக இளநிலை உதவியாளர் பணி நியமனம் வழங்கப்பட்டுள்ளது. 

இதற்கான அதிகாரப்பூர்வ உத்தரவைத் தமிழ்நாடு மீன்வளர்ச்சிக் கழக மேலாண்மை இயக்குநர் விஜயகார்த்திகேயன் ஜூன் 20-ஆம் தேதி சனிக்கிழமை வெளியிட்டுள்ளார். அமைச்சரின் இந்தப் பரிந்துரையும், நிர்வாகத்தின் அதிவிரைவான இந்த மனிதநேய நடவடிக்கையும் பாதிக்கப்பட்ட மீனவக் குடும்பத்தினரிடையே நெகிழ்ச்சியை ஏற்படுத்தியுள்ளது.