விமான பயிற்சி மையப் பணிகளுக்கு ஜூலை 15-க்குள் விண்ணப்பிக்கலாம்

» செய்திகள் - விளையாட்டு » மாவட்ட செய்தி (தூத்துக்குடி)

விமான பயிற்சி மையப் பணிகளுக்கு ஜூலை 15-க்குள் விண்ணப்பிக்கலாம் - டிட்கோ அறிவிப்பு!

ஞாயிறு 21, ஜூன் 2026 9:01:02 AM (IST)

கோவில்பட்டி அருகே மொட்டைமலை பகுதியில் அமையவுள்ள புதிய விமான பயிற்சி மையத்தின் கட்டுமானப் பணிகளைச் சீரமைத்துக் கண்காணிப்பதற்கான தகுதி வாய்ந்த பொறியியல் நிறுவன ஒப்பந்த அறிவிப்பைத் தமிழ்நாடு தொழில் வளர்ச்சிக் கழகம் (டிட்கோ) வெளியிட்டுள்ளது!

தூத்துக்குடி மாவட்டம் தூத்துக்குடி மாவட்டம் கோவில்பட்டி அருகே தோணுகால் ஊராட்சியில் அமைந்துள்ள மொட்டைமலை பகுதியில் உள்ள பழைய விமான ஓடுதளத்தைப் புதிய விமான பயிற்சி மையமாகப் (Aviation Training Centre) பயன்படுத்தும் வகையிலான திட்டப் பணிகளைத் தமிழ்நாடு தொழில் வளர்ச்சிக் கழகம் (டிட்கோ) தீவிரமாக மேற்கொண்டு வருகிறது.

இத்திட்டத்திற்காக, மொட்டைமலை விமான ஓடுதளப் பகுதியைத் டிட்கோ திட்ட அதிகாரிகள் அண்மையிலேயே நேரில் சென்று பார்வையிட்டு ஆய்வு செய்தனர். தொடர்ந்து, விமான பயிற்சி மையத்தை முழுமையாகச் செயல்படுத்துவதற்கான ஆரம்பகட்ட ஒப்பந்தத்தை டிட்கோ வெளியிட்டிருந்தது. அதனை ஏற்றுக்கொண்ட தனியார் நிறுவனம் சில மாதங்களுக்கு முன்பே அந்தப் பகுதியில் வெற்றிகரமாகப் பூமி பூஜையையும் நடத்தி முடித்துள்ளது.

தற்போது, இந்த விமான பயிற்சி மையத்தின் ஒட்டுமொத்த கட்டுமானப் பணிகளையும் முறையாக மேற்பார்வையிடுவதற்காக, தகுதி வாய்ந்த பொறியியல் நிறுவனங்களிடம் இருந்து ஒப்பந்தம் கோரி சனிக்கிழமை புதிய அறிவிப்பு வெளியிடப்பட்டுள்ளது.

இது குறித்த கூடுதல் விபரங்களைத் தெரிந்து கொள்ள விரும்பும் நிறுவனங்கள் சென்னை டிட்கோ நிறுவன அலுவலகத்தைத் தொடர்பு கொள்ளலாம் எனத் தெரிவிக்கப்பட்டுள்ளது. இந்த ஒப்பந்தப் புள்ளிகளுக்கு விண்ணப்பிக்க ஜூலை 15-ஆம் தேதி கடைசி நாளாக நிர்ணயிக்கப்பட்டுள்ளது. மேலும், இது தொடர்பான ஒப்பந்த முன்தயாரிப்புக் கூட்டம் (Pre-bid meeting) சென்னை டிட்கோ அலுவலகத்தில் ஜூன் 30-ஆம் தேதி மாலை 3 மணிக்கு நடைபெறும் என்றும் அறிவிக்கப்பட்டுள்ளது.

கோவில்பட்டி அருகே இந்த புதிய விமான பயிற்சி மையம் முழுமையாகச் செயல்பாட்டுக்கு வரும் பட்சத்தில், தூத்துக்குடி, நெல்லை, கன்னியாகுமரி உள்ளிட்ட தென் மாவட்டங்களைச் சேர்ந்த இளைஞர்களுக்குப் புதிய விமானப் பயிற்சி மற்றும் வேலைவாய்ப்புகள் எளிதாகக் கிடைக்கும். அதுமட்டுமன்றி, இப்பகுதியில் தொழில் வளம் பெருகி, பொருளாதார வளர்ச்சிக்கு மிகப்பெரிய ஊக்கம் அளிக்கும் எனப் பொதுமக்கள் மற்றும் சமூக ஆர்வலர்களிடையே பெரும் எதிர்பார்ப்பு எழுந்துள்ளது.

மக்கள் கருத்து

மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.

பெயர்: கருத்து: