திருச்செந்தூரில் அமைச்சர் அனிதா ராதாகிருஷ்ணன், பாஜக வேட்பாளர் ராதாகிருஷ்ணன் வாக்குப்பதிவு!

திருச்செந்தூர் சட்டமன்றத் தொகுதியில் தேர்தல் வாக்குப்பதிவு இன்று விறுவிறுப்பாக நடைபெற்று வருகிறது. அமைச்சர் அனிதா ராதாகிருஷ்ணன், மானாடு தண்டுபத்து ஊராட்சி ஒன்றிய நடுநிலைப் பள்ளியில் தனது வாக்கினைப் பதிவு செய்தார்.

தூத்துக்குடி மாவட்டம் திருச்செந்தூர் சட்டமன்றத் தொகுதியில் இன்று காலை முதலே வாக்குப்பதிவு விறுவிறுப்பாக நடைபெற்று வருகிறது. ஜனநாயக கடமையாற்ற பொதுமக்கள் நீண்ட வரிசையில் நின்று ஆர்வத்துடன் வாக்களித்து வருகின்றனர்.

திருச்செந்தூர் சட்டமன்றத் தொகுதியின் திமுக வேட்பாளரும், தமிழக மீன்வளம் மற்றும் கால்நடை பராமரிப்புத் துறை அமைச்சருமான அனிதா ராதாகிருஷ்ணன், தனது சொந்த ஊரான மானாடு தண்டுபத்து பகுதியில் உள்ள ஊராட்சி ஒன்றிய நடுநிலைப் பள்ளி வாக்குச்சாவடியில் தனது வாக்கினைப் பதிவு செய்தார்.

தேசிய ஜனநாயக கூட்டணி சார்பில் பாரதிய ஜனதா கட்சி வேட்பாளராகப் போட்டியிடும் கே.ஆர்.எம். ராதாகிருஷ்ணன், தனது குடும்பத்தினருடன் வந்து வாக்களித்தார். அவர் தனது சொந்த ஊரான ஆறுமுகநேரியில் உள்ள காமராஜ் சோமசுந்தரி மழலையர் மற்றும் தொடக்கப்பள்ளி வாக்குச்சாவடியில் தனது ஜனநாயகக் கடமையை நிறைவேற்றினார்.

தொகுதி முழுவதும் பலத்த போலீஸ் பாதுகாப்பு போடப்பட்டுள்ளது. முதியவர்கள் மற்றும் மாற்றுத்திறனாளிகளுக்குச் சிறப்பு வசதிகள் செய்யப்பட்டுள்ளன. அரசியல் கட்சித் தலைவர்கள் மற்றும் வேட்பாளர்கள் வாக்குப்பதிவு மையங்களுக்கு நேரில் வந்து நிலவரங்களை ஆய்வு செய்து வருகின்றனர். திருச்செந்தூர் தொகுதியில் முக்கிய வேட்பாளர்கள் அனைவரும் காலையிலேயே வாக்களித்து முடித்துள்ள நிலையில், மதிய நேரத்திலும் வாக்குப்பதிவு சூடுபிடிக்கத் தொடங்கியுள்ளது.