சட்டமன்றத் தேர்தலில் அதிமுகவிற்கு 21 நாடார் அமைப்புகள் ஆதரவு: இபிஎஸ் உடன் நிர்வாகிகள் சந்திப்பு

வரும் 2026 சட்டமன்றத் தேர்தலில் அனைத்திந்திய அண்ணா திராவிட முன்னேற்றக் கழகத்திற்கு (அதிமுக) ஆதரவு தெரிவிப்பதாக 21 நாடார் அமைப்புகள் அதிகாரப்பூர்வமாக அறிவித்துள்ளன.

அதிமுக வர்த்தக அணி செயலாளரும், முன்னாள் அமைச்சருமான சி.த. செல்லப்பாண்டியன் ஏற்பாட்டின்படி, நாடார் பாதுகாப்பு பேரவை தலைவர் இ.எம். சீனிவாசன் தலைமையில் பல்வேறு அமைப்புகளைச் சேர்ந்த நிர்வாகிகள் சென்னை பசுமை வழிச்சாலையில் உள்ள இல்லத்தில் அதிமுக பொதுச்செயலாளர்  எடப்பாடி பழனிசாமி அவர்களை இன்று (25.02.2026) காலை நேரில் சந்தித்து ஆதரவு கடிதத்தை வழங்கினர்.

முன்வைக்கப்பட்ட 10 அம்ச கோரிக்கைகள்

இந்தச் சந்திப்பின் போது, நாடார் சமுதாயத்தின் முன்னேற்றத்திற்காகப் பின்வரும் முக்கிய கோரிக்கைகள் எடப்பாடி பழனிசாமியிடம் முன்வைக்கப்பட்டன:

1. இட ஒதுக்கீடு: சாதிவாரி கணக்கெடுப்பு நடத்தி, நாடார் சமுதாயத்திற்கு கல்வி மற்றும் வேலைவாய்ப்பில் 15% தனி இட ஒதுக்கீடு வழங்க வேண்டும்.

2. பெயர் சூட்டுதல்: தூத்துக்குடி விமான நிலையத்திற்கு 'பத்மஸ்ரீ டாக்டர் பி. சிவந்தி ஆதித்தனார்' பெயரைச் சூட்டி, அங்கு அவரது உருவச் சிலையை அமைக்க வேண்டும்.

3. விமான நிலையச் சிலை: சென்னை விமான நிலையத்தில் பெருந்தலைவர் காமராஜரின் திருவுருவச் சிலையை அமைக்க வேண்டும்.

4. பனைத் தொழில்: பனைத் தொழிலாளர்களின் நீண்ட நாள் கோரிக்கையான கள்ளு இறக்கி விற்பனை செய்ய அனுமதி அளிக்க வேண்டும்.

5. அரசியல் பிரதிநிதித்துவம்: 234 சட்டமன்றத் தொகுதிகளிலும், அதிமுக கட்சிப் பொறுப்புகளிலும் நாடார் சமூகத்திற்கு உரிய பிரதிநிதித்துவம் வழங்கப்பட வேண்டும்.

6. உடன்குடி அனல் மின் நிலைய வேலைவாய்ப்பில் தூத்துக்குடி மாவட்ட மக்களுக்கு முன்னுரிமை அளிக்க வேண்டும்.

7. தாமிரபரணி ஆற்றைச் சீரமைக்கத் தேவையான உடனடி நடவடிக்கை எடுக்க வேண்டும்.

இந்நிகழ்வில் நாடார் பாதுகாப்பு பேரவை நிர்வாகிகள், அகில இந்திய நேதாஜி இளைஞர் முன்னேற்றப் படை தலைவர் ராஜேஷ், காமராஜர் நற்பணி இயக்கத் தலைவர் எஸ். அன்பு நாடார், மற்றும் பிரஸ் மீடியா டெவலப்பர் அசோசியேஷன், புதிய மக்கள் தமிழ்தேசம் உள்ளிட்ட 21 அமைப்புகளின் பிரதிநிதிகள் கலந்துகொண்டனர். மேலும், அதிமுக தரப்பில் வர்த்தக அணி துணைச் செயலாளர்கள் ஜி. சங்கர், எஸ். சிவகுமார், தூத்துக்குடி மாவட்ட நிர்வாகிகள் துரைசிங், ஜீவா பாண்டியன் மற்றும் அண்ணா தொழிற்சங்க நிர்வாகிகள் பலர் உடனிருந்தனர்.