தூத்துக்குடியில் தூய்மைப் பணியாளர் உடலை வாங்க மறுத்து உறவினர்கள் முற்றுகைப் போராட்டம்!

தூத்துக்குடி மாநகராட்சியில் பாதாளச் சாக்கடைப் பணியின்போது விஷவாயு தாக்கி உயிரிழந்த ஒப்பந்தத் தொழிலாளி குடும்பத்திற்கு உரிய இழப்பீடு வழங்கக் கோரி, மாநகராட்சி அலுவலகத்தை முற்றுகையிட்டு பல்வேறு அமைப்பினர் போராட்டத்தில் ஈடுபட்டதால் பரபரப்பு ஏற்பட்டது.

நெல்லை மாவட்டம் பருத்திகுளம் பகுதியைச் சேர்ந்தவர் ராஜ்குமார். இவர் தூத்துக்குடி மாநகராட்சியில் ஒப்பந்த அடிப்படையில் தூய்மைப் பணியாளராகப் பணியாற்றி வந்தார். நேற்று மாலை, தூத்துக்குடி ஆதிபராசக்தி நகர் பகுதியில் ராஜ்குமார் மற்றும் சங்கர் ஆகிய இரு பணியாளர்கள் பாதாளச் சாக்கடைக்குள் இறங்கிப் பணியில் ஈடுபட்டனர்.

அப்போது எதிர்பாராத விதமாகப் பரவிய விஷவாயு தாக்கியதில், ராஜ்குமார் சாக்கடைக்குள்ளேயே மயங்கி விழுந்து பரிதாபமாக உயிரிழந்தார். உடன் இருந்த சங்கர் மயக்கமடைந்த நிலையில், சக பணியாளர்களால் மீட்கப்பட்டு முதலுதவி சிகிச்சைக்குப் பின் உயிர் தப்பினார். தகவலறிந்து வந்த தீயணைப்புத் துறையினர், சுமார் அரை மணி நேரப் போராட்டத்திற்குப் பிறகு ராஜ்குமாரின் உடலை மீட்டு, உடற்கூறு ஆய்வுக்காகத் தூத்துக்குடி அரசு மருத்துவக் கல்லூரி மருத்துவமனைக்கு அனுப்பி வைத்தனர்.