மதுபானக் கூடத்தில் கேரள நபர் குத்திக் கொலை : ஒருவர் கைது

சாத்தான்குளம் அருகே மதுபானக் கூடத்தில் ஏற்பட்ட தகராறில் கேரள நபர் மது பாட்டிலால் குத்திக் கொலை செய்யப்பட்டார்.

திருவனந்தபுரத்தைச் சேர்ந்தவர் பாச்சான் மகன் விஜூ (56). இவர், சாத்தான்குளம் ஊராட்சி ஒன்றிய அலுவலகம் முன்புள்ள உணவகத்தில் கடந்த வாரம் வேலைக்கு சேர்ந்து பணி செய்து வந்தார். நேற்று வேலையின் போது, விஜூ மது குடித்துவிட்டு வந்ததால் கடை உரிமையாளர் அவரை வேலையை விட்டு நீக்கியதாக கூறப்படுகிறது.

பின்னர், விஜூ சாத்தான்குளம் அருகே உள்ள அமுதுண்ணாக்குடி மதுபானக் கடையில் மது வாங்கி, அதன் அருகில் உள்ள கூடத்தில் மது அருந்த சென்றுள்ளார். அப்போது சாத்தான்குளம் அருகே உள்ள ஞானியார் குடியிருப்பைச் சேர்ந்த சித்திரைவேல் மகன் சித்திரைமுத்து என்ற வெள்ளையனும் (56) அங்கு வந்து மது குடித்துள்ளார்.

அப்போது இருவருக்குமிடையே ஏற்பட்ட வாக்குவாதத்தில் ஆத்திரம் அடைந்த சித்திரைமுத்து, அருகில் கிடந்த மது பாட்டிலை உடைத்து விஜூ கழுத்தில் குத்தியதாக கூறப்படுகிறது. இதில் பலத்த காயமடைந்த அவர் சம்பவ இடத்திலேயே உயிரிழந்தார். இதுகுறித்து தகவல் அறிந்த சாத்தான்குளம் காவல் ஆய்வாளர் ஸ்டீபன் தலைமையிலான போலீசார் விரைந்து சென்று சடலத்தை மீட்டு, தூத்துக்குடி அரசு மருத்துவக் கல்லூரி மருத்துவமனைக்கு உடல்கூறு ஆய்வுக்கு அனுப்பி வைத்தனர்.

கொலை செய்யப்பட்ட நபரின் உறவினர்கள் திருவனந்தபுரத்தில் உள்ளதால் அவர்களுக்கு போலீசார் தகவல் தெரிவித்துள்ளனர். கொலை தொடர்பாக சித்திரைமுத்து என்ற வெள்ளையனை போலீசார் கைது செய்து, மேலும் விசாரித்து வருகின்றனர்.