சதுரங்க சாம்பியன்ஷிப் போட்டியில் தூத்துக்குடி மாணவி முதலிடம் : ஆட்சியர் வாழ்த்து

24வது உலக தனிநபர் சதுரங்க சாம்பியன்ஷிப் போட்டியில் முதல் இடத்தை பெற்ற மாணவி துர்க்காஸ்ரீ என்பவருக்கு ஆட்சியர் க.இளம்பகவத் வாழ்த்து தெரிவித்தார். 

தூத்துக்குடி மாவட்ட ஆட்சியர் அலுவலகக் கூட்டரங்கில், மாவட்ட ஆட்சியர் க.இளம்பகவத், தலைமையில் திங்கள்கிழமை மக்கள் குறை களையும் நாள் கூட்டம் இன்று (11.08.2025) நடைபெற்றது. பொதுமக்களிடமிருந்து கல்வி உதவித்தொகை, இலவச வீட்டுமனைப்பட்டா, பட்டா மாறுதல் உத்தரவு, வரன்முறைப்படுத்தி பட்டா, கலைஞரின் கனவு இல்லம் திட்டத்தின் கீழ் வீடு வேண்டி, தொழில் கடனுதவி, முதியோர் உதவித்தொகை, விதவை உதவித்தொகை, வேலைவாய்ப்பு உள்ளிட்ட பல்வேறு கோரிக்கைகள் அடங்கிய 483 கோரிக்கை மனுக்கள் பெறப்பட்டது. 

பெறப்பட்ட கோரிக்கை மனுக்கள் மீது உரியநடவடிக்கை மேற்கொள்ளுமாறு துறைசார்ந்த அலுவலர்களுக்கு மாவட்ட ஆட்சியர் அறிவுறுத்தினார். முன்னதாக, மாற்றுத்திறனாளிகளை நேரில் சந்தித்து பல்வேறு கோரிக்கைகள் அடங்கிய 17 கோரிக்கை மனுக்களைப் பெற்றுக்கொண்டு அவர்களின் கோரிக்கைகளை கனிவுடன் கேட்டறிந்தார்.

அதனைத்தொடர்ந்து, மாவட்ட மாற்றுத்திறனாளிகள் நலத்துறை சார்பில் 2 பயனாளிகளுக்கு பாதுகாவலர் சான்றுகளையும், வருவாய் மற்றும் பேரிடர் மேலாண்மைத்துறை சார்பில் விபத்தில் மரணமடைந்தவரின் குடும்பத்திற்கு முதலமைச்சர் பொது நிவாரண நிதியிலிருந்து ரூ.1,00,000க்கான காசோலையினை மாவட்ட ஆட்சியர் க.இளம்பகவத், வழங்கினார்.

24வது உலக தனிநபர் சதுரங்க சாம்பியன்ஷிப் IPCA - 2025க்கான போட்டியில் கலந்துகொண்டு முதல் இடத்தை பெற்ற துர்க்காஸ்ரீ என்பவர் மாவட்ட ஆட்சியர் க.இளம்பகவத், அவர்களிடம் சான்றிதழினை காண்பித்து வாழ்த்துபெற்றார். இந்நிகழ்வில், மாவட்ட வருவாய் அலுவலர் ஆ.இரவிச்சந்திரன், உதவி இயக்குநர் (ஊராட்சிகள்) சாந்தி, மாவட்ட மாற்றுத்திறனாளி நல அலுவலர் பிரம்மநாயகம், உதவி ஆட்சியர் (பயிற்சி) தி.புவனேஷ்ராம், மற்றும் அனைத்துத்துறை சார்ந்த அரசு அலுவலர்கள் கலந்து கொண்டனர்.