கோவில்பட்டியில் மாரத்தான் போட்டி: தூத்துக்குடி கல்லூரி மாணவர் முதலிடம்!

தூத்துக்குடி மாவட்டம், கோவில்பட்டி எஸ்.எஸ் துரைச்சாமி நாடார் மாரியம்மாள் கல்லூரி உடற்கல்வியில் துறை சார்பில் காமராஜரின் 123வது பிறந்த தினத்தை முன்னிட்டு காமராஜர் சிலை முன்பு துவங்கி மாதாங் கோவில் ரோடு, எட்டையாபுரம் ரோடு, புது ரோடு, மெயின் ரோடு வழியாக கல்லூரி வரையில் 5 கிலோ மீட்டர் தூரம் மாரத்தான் போட்டி நடந்தது. 

இந்நிகழ்ச்சிக்கு கோவில்பட்டி நாடார் உறவின்முறை சங்கத் தலைவர் ஆர்.எஸ் ரமேஷ் தலைமை வகித்தார். சங்க துணைத் தலைவர் செல்வராஜ்,செயலாளர் ஜெயபாலன், பொருளாளர் சுரேஷ் குமார் ஆகியோர் முன்னிலை வகித்தனர். கல்லூரி செயலாளர் கண்ணன் அனைவரையும் வரவேற்றார். மாரத்தான் போட்டியை கோவில்பட்டி துணை காவல் கண்காணிப்பாளர் ஜெகநாதன் கொடியசைத்து துவக்கி வைத்தார். 

இதில், தூத்துக்குடி, கோயம்புத்தூர், பொள்ளாச்சி உள்ளிட்ட பல்வேறு பகுதிகளிலிருந்து 300-க்கும் மேற்பட்டோர் பங்கேற்றனர். தூத்துக்குடி காமராஜ் கல்லூரி மாணவர் கருத்தபாண்டிக்கு முதலிடம் பிடித்து ரூ.5000 ரொக்க பரிசு வென்றார். பொள்ளாச்சி எஸ்.டி.சி கல்லூரி மாணவர் கனிராஜ் 2வது இடமும், பொள்ளாச்சி என்.ஜி.பி கல்லூரி மாணவர் கபிலன் 3ம் இடமும் பிடித்தனர். 

பின்னர் கல்லூரியில் நடந்த பரிசளிப்பு விழாவில் கோவில்பட்டி கிழக்கு காவல் நிலைய ஆய்வாளர் மாரியப்பன் கலந்துகொண்டு வெற்றி பெற்ற மாணவர்களுக்கு பரிசுத் தொகை மற்றும் சான்றிதழ்களை வழங்கினார். 4 முதல் 10 இடம் பெற்றவர்களுக்கு ரொக்கப் பரிசு ரூ.500 மற்றும் சான்றிதழும்,கலந்து கொண்ட 70 வயது முதியவர் கண்ணன், 65 வயது முதியவர் கிருபானந்தம் ஆகியோருக்கு சிறப்பு பரிசாக ரொக்கம் 500ம் சான்றிதழும் வழங்கப்பட்டது.

இதில் கல்லூரி உறுப்பினர் அருண், சரவணகுமார் முதல்வர் செல்வராஜ், ஐ.சி.எம் நடுநிலைப்பள்ளி பொருளாளர் ராஜா அமரேந்திரன், உறுப்பினர் தாயப்பன், உடற் கல்வியில் துறை பேராசிரியர்கள் ரமேஷ் பாண்டியன், சிவா, வெங்கடேஷ்,உள்பட பலர் கலந்து கொண்டனர். நிறைவாக கல்லூரி உடற்கல்விவியல் துறை தலைவர் செல்லத்துரை நன்றி கூறினார்.