குட்கா, பான் மசாலா கடத்தி வந்த டீக்கடைக்காரர் கைது

தூத்துக்குடியில் இரு சக்கர வாகனத்தில் தமிழக அரசால் தடை செய்யப்பட்ட புகையிலை பொருட்களை கடத்தி வந்த டீக்கடைக்காரரை போலீசார் கைது செய்தனர்.  

தூத்துக்குடியில், மதுரை பைபாஸ் ரோடு ஸ்டெர்லைட் பாலம் அருகில் சிப்காட் காவல் நிலைய இன்ஸ்பெக்டர்  சைரஸ் தலைமையிலான போலீசார் வாகன சோதனையில் ஈடுபட்டிருந்த போது, அவ்வழியே வந்த இருசக்கர வாகனத்தை நிறுத்தி சோதனையிட்டனர். அதில் தமிழக அரசால் தடை செய்யப்பட்ட 5.75 கிலோ கணேஷ் புகையிலை, 975  கிராம் விமல் பான் மசாலா இருப்பது தெரியவந்தது. 

இது தொடர்பாக அந்த வாகனத்தில் வந்தவரிடம் விசாரணை நடத்தியதில், அவர் தூத்துக்குடி மீளவிட்டான் தெற்கு தெருவை சேர்ந்த சுந்தர் மகன் அண்ணாதுரை (52) என்பதும், இவர் மீள விட்டானில் டீக்கடை நடத்தி வருவதும் அங்கு வைத்து புகையிலை பொருட்களை விற்பனை செய்து வந்ததும் தெரியவந்தது. இதையடுத்து புகையிலை பொருட்களை போலீசார் பறிமுதல் செய்து, அண்ணாதுரையை போலீசார் கைது செய்து விசாரணை நடத்தி வருகிறார்கள்.