திருச்செந்தூர் கோவில் கடற்கரையில் கல்வெட்டு: பக்தர்கள் வியப்பு!

திருச்செந்தூர் சுப்பிரமணிய சுவாமி கோவில் கடற்கரையில் கடந்த சில நாட்களாக அமாவாசை, பவுர்ணமி போன்ற நாட்களில் கடல் திடீரென உள்வாங்குவதும், வெளியே சீற்றம் அதிகமாக காணப்பட்டும் வருகிறது. கடந்த 31-ந்தேதி அமாவாசையாக இருந்ததால் 2 நாட்களாக கடல் சீற்றம் அதிகமாக காணப்பட்டது. இதனால் கோவில் முன்புள்ள கடற்கரையில் அதிக அளவில் கடல் அரிப்பு ஏற்பட்டு சுமார் 20 அடி நீளத்திற்கு 10 அடி ஆழத்திற்கு இந்த கடலில் அரிப்பு ஏற்பட்டது.

இந்த நிலையில் கடல் அரிப்பு ஏற்பட்ட பகுதியில் சுமார் 4 அடி நீள கல்வெட்டு கிடந்தது. அதில், ‘முனி தீர்த்தம்’ என்றும், ‘இதன் பலன் ஆன்மாக்களை கட்டியிருக்கிற நல்வினை தீவினை ஆகிய இரும்புச் சங்கிலியை தேய்ப்பதற்கு அரத்தை போலிருந்து பலனைக் கொடுக்கும்’ என்றும் பொறிக்கப்பட்டு இருந்தது. அந்த கல்வெட்டினை கடற்கரை பாதுகாப்பு பணியாளர்கள் பாதுகாப்பாக எடுத்து கரையில் வைத்தனர்.