வீட்டின் பூட்டை உடைத்து ரூ.3லட்சம் நகை, பணம் திருட்டு: மர்ம நபர்கள் கைவரிசை!

முறப்பநாடு அருகே வீட்டின் பூட்டை உடைத்து ரூ.3லட்சம் மதிப்புள்ள நகை, பணத்தை திருடிய மர்ம நபர்களை போலீசார் தேடி வருகின்றனர். 

தூத்துக்குடி மாவட்டம் முறப்பநாடு அருகே உள்ள மணக்கரை கிராமம் பிள்ளையார் கோவில் தெருவைச் சேர்ந்தவர் லட்சுமணன் மனைவி காந்திமதியம்மாள் (68). இவர் நேற்று முன்தினம் இரவு தனது வீட்டுக் கதவை உள்பக்கமாக பூட்டிக் கொண்டு ஒரு அறையில் படுத்து தூங்கினாராம். மறுநாள் காலை எழுந்து பார்த்தபோது வீட்டில் உள்ள கதவுகள் திறக்கப்பட்டு கிடந்தது.

உடனடியாக நகைகள் இருந்த அறையில் சென்று பார்த்த போது அங்கே பீரோ உடைக்கப்பட்டு கிடந்தது. அதில் இருந்த 3 பவுன் தங்கச் சங்கிலி ரொக்கப் பணம் ரூ.58 ஆயிரம் ஆகியவை திருடு போயிருந்தது. இதன் மதிப்பு ரூ.3 லட்சம் ஆகும்.  இந்த சம்பவம் குறித்து முறப்பநாடு காவல் நிலையத்தில் காந்திமதியம்மாள் அளித்த புகாரின் பேரில் சப் இன்ஸ்பெக்டர் ஆனந்த முத்துராமன் வழக்குப் பதிந்து, நகை பணத்தை திருடிய மர்ம நபர்களை தேடி வருகிறார்.