கோவில்பட்டி மாவட்டம் காலத்தின் கட்டாயம்: காலதாமதம் வேண்டாம்!

கோவில்பட்டி வருவாய் மாவட்டம் காலத்தின் கட்டாயம், காலதாமதம் இன்றி நடவடிக்கை எடுக்க வேண்டும் என சமூக ஆர்வலர் ஆ.சம்பத்குமார் கருத்து தெரிவித்துள்ளார். 

தீப்பெட்டித் தொழிற்சாலைகளுக்கும், கடலை மிட்டாய் தொழில்களுக்கும் தனித்த அடையாளத்தைப் பெற்று வெகு வேகமாக வளர்ந்து வரும் தொழில்நகரம் கோவில்பட்டியாகும். 

தேசிய நெடுஞ்சாலை மற்றும் தொடர்வண்டி இருப்புப்பாதை அமையப்பெற்று போக்குவரத்து வசதியில் தென் தமிழ்நாட்டில் தன்னிகரற்ற நகராகவும் விளங்குகிறது கோவில்பட்டி.

அரசு, அரசு உதவிபெறும் மற்றும் தனியார் பள்ளிகள், கல்லூரிகள் என பலவகைப்பட்ட கல்வி நிலையங்களும் அமையப்பெற்ற ஊர் கோவில்பட்டி. 

ஹாக்கி விளையாட்டிற்கும் பல்வகை  படைப்பாளிகளுக்கும் பெயர்பெற்ற ஊர் கோவில்பட்டி. 

மாவட்ட அரசு தலைமை மருத்துவமனை மற்றும் பல்வகை நோய்களுக்கும் சிறப்பு நிபுணர்கள் அடங்கிய தனியார் மருத்துவமனைகளும் நிரம்பிய ஊர் கோவில்பட்டி.

சட்டமன்றத் தொகுதி, கோட்டம், வட்டம், ஒன்றியம், நகராட்சி, கல்வி மாவட்டம், என பலவகைப்பட்ட நிர்வாக கட்டமைப்புமிக்கது கோவில்பட்டி நகரம்.

நகராட்சி பகுதிகளில் மட்டும் சுமார் இரண்டு லட்சம் மக்கள் வாழ்கிறார்கள். திட்டங்குளம், பாண்டவர்மங்கலம், மந்தித்தோப்பு, தோனுகால், நாலட்டின்புதூர், இலுப்பையூரணி, கூசாலிபட்டி, போன்ற கோவில்பட்டியை ஒட்டியுள்ள ஊராட்சிப்பகுதிகளையும் சேர்த்தால் சுமார் ஆறு லட்சத்திற்கும் மேலான மக்கள் வாழ்கிற மாநகர் கோவில்பட்டி.

கோவில்பட்டி, விளாத்திகுளம், மற்றும் ஓட்டப்பிடாரம் சட்டமன்றத் தொகுதிகளை உள்ளடக்கிய புதிய வருவாய் மாவட்டமாக கோவில்பட்டி அமைவது என்பது காலத்தின் கட்டாயம். அரசியல் காரணங்களுக்காக கோவில்பட்டி மாவட்டம் அறிவிப்பு தள்ளிப்போடப் படுவதாக அரசியல் விமர்சர்கள் கருதுகின்றனர். ஏனெனில், கோவில்பட்டி மாவட்டத்திற்கான முன்னெடுப்பு கடந்த மூன்று முறை இத்தொகுதியின் சட்டமன்ற உறுப்பினராக இருந்துவரும் ஆசிரியப்பெருந்தகை கடம்பூர்.செ.ராஜூ முன்னெடுத்ததால் இப்போது அறிவிப்பு வரும் பட்சத்தில் அதன் பலன் ஆளும் கட்சியைவிட சட்டமன்ற உறுப்பினருக்கே அதிகமாகச் செல்லும் என்றும் அரசியல் விவரம் கூறுகின்றனர். அதேநேரம் ஆளுங்கட்சி தரப்பிலோ புதிய வருவாய் மாவட்டம் அமைவதற்கான பூர்வாங்க வேலைகள் தலைமைச் செயலகத்தில் நடைபெற்று வருவதாகவும் கூறுகிறார்கள்.

கோவில்பட்டி புதிய வருவாய் மாவட்டமாக உருவாகும் பட்சத்தில் அரசின் கூடுதல் நிதி ஒதுக்கீடு கோவில்பட்டிக்குக் கிடைக்கும். மக்கள் எளிதில் மாவட்ட ஆட்சித்தலைவர், காவல்துறை கண்காணிப்பாளர் போன்ற உயர் பதவிகளில் உள்ள அரசு அதிகாரிகளை அணுக முடியும். புதிய புதிய நியமனங்கள் மற்றும் கட்டிடங்கள் உருவாகும். கோவில்பட்டியும் அதன் சுற்றுவட்டாரப் பகுதிகளும் வளரும். 

எனவே, அரசியல் காரணங்களுக்காக   கோவில்பட்டி மாவட்டம் அமைவதை தமிழ்நாடு அரசு காலம் தாழ்த்தக்கூடாது என்ற வேண்டுகோளை கோவில்பட்டி மக்கள் முன்வைக்கிறார்கள். நாடாளுமன்றத் தேர்தலுக்கு முன்பாக இந்த அறிவிப்பு வரும் என்று மக்கள் ஆவலுடன் எதிர்பார்க்கிறார்கள்.  இந்த விஷயத்தில் அரசியலுக்கு அப்பாற்பட்டு கோவில்பட்டி மற்றும் அதன் சுற்றுவட்டார பகுதிகளில் வாழும் அறிவார்ந்த பெருமக்கள் அணிசேர்ந்து தமிழ்நாடு அரசிற்கு தொடர்ந்து கோரிக்கை வைக்க வேண்டும்.

நிர்வாக வசதி மேம்பட மக்கள் அரசின் திட்டங்களின் பலன்களை முழுமையாக மற்றும் விரைவில் பெற கோவில்பட்டி மாவட்டம் உருவாக வேண்டும் என்று சமூக ஆர்வலர் ஆ.சம்பத்குமார், தெரிவித்துள்ளார்.