கஜகஸ்தானில் நடைபெற்ற உலக ‘சீனியர்’ மல்யுத்த சாம்பியன்ஷிப் தொடரின் 59 கிலோ பிரிவில், இந்தியாவின் மணிஷா பன்வாலா தங்கப் பதக்கம் வென்று புதிய வரலாறு படைத்துள்ளார்.
கஜகஸ்தானில் நடைபெற்று வரும் உலக மல்யுத்த சாம்பியன்ஷிப் தொடரில், பெண்களுக்கான 59 கிலோ பிரீஸ்டைல் பிரிவில் இந்தியா சார்பில் பங்கேற்ற 29 வயதான மணிஷா பன்வாலா இறுதிப்போட்டிக்கு முன்னேறினார்.
நேற்று நடைபெற்ற விறுவிறுப்பான இறுதிப்போட்டியில் மணிஷா, அமெரிக்காவின் முன்னணி வீராங்கனையான அபிகெய்ல் எலிசபெத்தை எதிர்கொண்டார். தலா 3 நிமிடங்கள் கொண்ட இரண்டு சுற்றுகளாக இப்போட்டி நடைபெற்றது. முதல் சுற்றின் முடிவில் மணிஷா 1–5 என்ற புள்ளி கணக்கில் கணிசமாகப் பின்தங்கியிருந்தார்.
இருப்பினும், இரண்டாவது சுற்றில் (கடைசி 3 நிமிடங்கள்) அசத்தலான ஆட்டத்தை வெளிப்படுத்திய மணிஷா, விடாமுயற்சியுடன் போராடி அடுத்தடுத்து 7 புள்ளிகளைக் கைப்பற்றினார். ஆட்டத்தின் முடிவில் 8–6 என்ற புள்ளிக் கணக்கில் எதிரணியை வீழ்த்தி மணிஷா அபார வெற்றி பெற்றார்.
இந்த வெற்றியின் மூலம், உலக மல்யுத்த ‘சீனியர்’ சாம்பியன்ஷிப் போட்டியின் 39 ஆண்டுகால வரலாற்றில் தங்கப் பதக்கம் வென்ற முதல் இந்திய வீராங்கனை என்ற பிரம்மாண்ட சாதனையை மணிஷா படைத்துள்ளார்.
முன்னதாகப் பெண்கள் பிரிவில் அன்ஷு மாலிக் (2021), நீலம் (2026), காஜல் (2026) ஆகியோர் வெள்ளிப் பதக்கம் மட்டுமே வென்றிருந்தனர். மேலும், ஆண்களுக்கான பிரிவில் கடந்த 2010-ஆம் ஆண்டு சுஷில் குமார் தங்கம் வென்றிருந்த நிலைக்குப் பிறகு, உலக மல்யுத்த சாம்பியன்ஷிப்பில் தங்கம் வெல்லும் இரண்டாவது இந்தியர் என்ற பெருமையையும் மணிஷா பன்வாலா தட்டிச் சென்றுள்ளார்.