தூத்துக்குடி வ.உ. சிதம்பரனார் துறைமுகம் பசுமை மாற்றத்தின் முதன்மை மையம்: ஐசிசிடி கொள்கை அறிக்கை வெளியீடு!

இந்தியாவின் பசுமை கடல்சார் மாற்றத்தை விரைவுபடுத்தும் வகையில், பன்னாட்டுத் தூய்மைப் போக்குவரத்து கவுன்சில் (ICCT) தயாரித்துள்ள "கடல்சார் கார்பன் குறைப்பில் வ.உ. சிதம்பரனார் துறைமுகத்தின் பங்கு" என்ற கொள்கை அறிக்கை, புதுடெல்லியில் நடைபெற்ற 'இந்தியத் தூய்மைப் போக்குவரத்து உச்சிமாநாடு 2026'-இல் வெளியிடப்பட்டது.

தேசிய பசுமை ஹைட்ரஜன் திட்டத்தின் கீழ் இந்தியாவின் முதல் பசுமை ஹைட்ரஜன் மையமாகத் திகழும் இத்துறைமுகத்தில், 3 MW பசுமை ஹைட்ரஜன் உற்பத்தி நிலையம் அமைக்கப்பட்டு வருகிறது. 2 × 750 கன மீட்டர் பசுமை மெத்தனால் சேமிப்புக் கிடங்கு, பசுமை அமோனியாவிற்கான பிரத்யேகப் படகுத் துறை மற்றும் கப்பல்களுக்குக் கரையில் இருந்தே மின்சாரம் வழங்கும் (Shore-to-Ship power) வசதிகள் உருவாக்கப்பட்டு வருகின்றன.

பசுமை எரிபொருள் உற்பத்தியாளர்களுக்காக 501 ஏக்கர் நிலம் ஒதுக்கப்பட்டு, ரூ.41,860 கோடி மதிப்பிலான முதலீடுகள் ஈர்க்கப்பட்டுள்ளன. மத்திய அரசின் 'ஹரித் சாகர்' வழிகாட்டுதலின் படியும், பிரதமரின் 2070-க்குள் 'பூஜ்ய உமிழ்வு' (Net Zero) இலக்கின் படியும் இத்துறைமுகம் தொடர்ந்து பசுமைத் திட்டங்களை முன்னெடுத்து வருகிறது எனத் துறைமுகச் சேர்மன் சுசாந்த குமார் புரோஹித் தெரிவித்துள்ளார்.