தூத்துக்குடி ஸ்டெர்லைட் ஆலைக்கு எதிரான போராட்டத்தின் போது 15 பேர் சுட்டுக்கொல்லப்பட்ட சம்பவத்தில், குற்றஞ்சாட்டப்பட்ட அதிகாரிகள் மீது நடவடிக்கை எடுக்காததைக் நியாயப்படுத்தும் வகையில் சட்டமன்றத்தில் பேசிய எதிர்க்கட்சித் தலைவருக்குச் 'ஸ்டெர்லைட் எதிர்ப்பு தூத்துக்குடி மாவட்ட மக்கள் கூட்டமைப்பு' தனது வன்மையான கண்டனத்தைப் பதிவு செய்துள்ளது.
தமிழகச் சட்டமன்றத்தில் இன்று நடைபெற்ற காவல்துறை மானியக் கோரிக்கை விவாதத்தின் போது, தூத்துக்குடி துப்பாக்கிச் சூடு நடத்திய அதிகாரிகள் மீது கடந்த காலத்தில் எவ்வித நடவடிக்கையும் எடுக்கப்படவில்லை எனப் பொதுப்பணித்துறை அமைச்சர் குற்றம் சாட்டினார்.
இதற்குப் பதிலளித்துப் பேசிய எதிர்க்கட்சித் தலைவர், "நாங்கள் நடவடிக்கை எடுக்கவில்லை; துணிவிருந்தால் நீங்கள் தண்டியுங்கள்" எனக் கூறியது பெரும் சர்ச்சையை ஏற்படுத்தியுள்ளது. இது குறித்துச் ஸ்டெர்லைட் எதிர்ப்பு தூத்துக்குடி மாவட்ட மக்கள் கூட்டமைப்பின் ஒருங்கிணைப்பாளர் மா. கிருஷ்ணமூர்த்தி வெளியிட்டுள்ள அறிக்கையில் கூறியிருப்பதாவது:
"15 அப்பாவி மனித உயிர்களைப் பலிகொண்ட காவல்துறை மற்றும் வருவாய்த்துறை அதிகாரிகள் மீது நடவடிக்கை எடுக்கவில்லை என்பதை எவ்விதக் குற்றவுணர்ச்சியுமின்றி ஒப்புக்கொண்டதோடு, 'முடிந்தால் நீங்கள் நடவடிக்கை எடுங்கள்' எனச் சட்டமன்றத்தில் சவால் விட்ட எதிர்க்கட்சித் தலைவரின் ஆணவப் பேச்சு வன்மையாகக் கண்டிக்கத்தக்கது.
கடந்த காலங்களில் தமிழகத்தை ஆண்ட அதிமுக மற்றும் திமுக ஆகிய இரு கட்சிகளுமே அக்கொலையாளிகளைக் காப்பாற்றுவதிலும், அவர்களுக்குத் தொடர்ந்து பதவி உயர்வுகள் வழங்குவதிலுமே குறியாக இருந்தன. இந்த இரு கட்சிகளின் மக்கள் விரோதச் செயல்களால்தான், அவர்கள் இன்று மக்களால் புறக்கணிக்கப்பட்டு எதிர்க்கட்சி வரிசையில் உட்கார வேண்டிய அவலச் சூழலுக்குத் தள்ளப்பட்டுள்ளனர்."
"தமிழகத்தை தற்போது ஆளும் த.வெ.க. அரசு, கடந்த கால அதிமுக, திமுக அரசுகள் செய்த அதே தவறுகளைத் திரும்பச் செய்துவிடக் கூடாது. முன்னாள் நீதியரசர் அருணா ஜெகதீசன் ஆணைய அறிக்கையில் தெளிவாகச் சுட்டிக்காட்டப்பட்டுள்ள குற்றவாளிகளான அதிகாரிகள் மீது உடனடியாகக் குற்றவியல் நடவடிக்கை மேற்கொண்டு, அவர்களைப் பணியிலிருந்து நீக்கிச் சிறையில் அடைக்க வேண்டும்" என அக்கூட்டமைப்பு வலியுறுத்தியுள்ளது.