தூத்துக்குடி மாவட்டம் கயல்பட்டணம் காயல் மருத்துவ அறக்கட்டளை (K.M.T.) மருத்துவமனையில் விருத்தசேதனம் அறுவை சிகிச்சை மேற்கொண்ட சிறுவன், மயக்க மருந்து கோளாறால் கவலைக்கிடமாக உள்ளதாக அவனது தாய் தூத்துக்குடி மாவட்டக் காவல் கண்காணிப்பாளரிடம் அளித்துள்ள புகார் மனு அப்பகுதியில் பெரும் பரபரப்பை ஏற்படுத்தியுள்ளது.
கயல்பட்டணம் K.T.M. தெருவைச் சேர்ந்த M. ராபிதா என்பவர் தனது மகனுக்கு விருத்தசேதன அறுவை சிகிச்சை மேற்கொள்வதற்காக கடந்த 12.10.2026 அன்று K.M.T. மருத்துவமனையில் அனுமதித்துள்ளார். மருத்துவர் ரபீக் என்பவரின் கண்காணிப்பில் சிகிச்சை அளிக்கப்பட்டு வந்த நிலையில், 20.10.2026 அன்று பகல் 12:00 மணிக்குச் சிறுவனுக்கு மயக்க மருந்து அளிக்கப்பட்டு 1:00 மணிக்கு அறுவை சிகிச்சைக்கு அழைத்துச் செல்லப்பட்டுள்ளான்.
மாலை 4:00 மணிக்கு அறுவை சிகிச்சை முடிந்ததாகத் தெரிவிக்கப்பட்ட நிலையில், 5:00 மணியளவில் சிறுவனுக்கு மாரடைப்பு ஏற்பட்டுள்ளது. மயக்க மருந்து கொடுத்ததன் காரணமாகவே மீண்டும் மாரடைப்பு ஏற்பட்டதாகக் கூறிச் சிறுவனுக்கு எலெக்ட்ரிக் ஷாக் சிகிச்சை அளிக்கப்பட்டது.
சிறுவனின் உடல்நிலை மிக மோசமடைந்ததால் மேல் சிகிச்சைக்குக் கொண்டு செல்ல அறிவுறுத்தப்பட்டது. ஆனால் K.M.T. மருத்துவமனையில் ஆம்புலன்ஸ் வசதி இல்லாததால் வேறு ஆம்புலன்ஸ் வரவழைக்கப்பட்டுத் திருச்செந்தூர் அரசு மருத்துவமனைக்குச் சிறுவன் கொண்டு செல்லப்பட்டான். அங்கு 17 நாட்கள் தீவிர சிகிச்சைப் பிரிவில் அனுமதிக்கப்பட்டிருந்த சிறுவன், உடல் நிலை கவலைக்கிடமாக உள்ளது.
இதற்கான காரணம் குறித்துக் கேட்டபோது விரிவான அறிக்கை தருவதாகக் கூறிய மருத்துவர்கள் இதுவரை எந்த அறிக்கையும் வழங்கவில்லை. மருத்துவர்களின் அலட்சியப் போக்கும் கவனக்குறைவுமே இதற்கு காரணம் எனக் குற்றம் சாட்டிய தாய் ராபிதா, சம்பந்தப்பட்ட மருத்துவர்கள் மீது சட்டப்பூர்வ நடவடிக்கை எடுக்கக் கோரி தூத்துக்குடி மாவட்டக் காவல் கண்காணிப்பாளரிடம் புகார் அளித்துள்ளார்.
இப்புகார் மனுவின் அடிப்படையில் காவல் துறையினர் வழக்குப் பதிவு செய்து தீவிர விசாரணை மேற்கொண்டு வருகின்றனர்.