இது குறித்து அவர் தனது எக்ஸ் (X) சமூக வலைதளப் பக்கத்தில் வெளியிட்டுள்ள அறிக்கையில் தெரிவித்திருப்பதாவது: 'சிங்கப்பெண் படை எங்கே? பெண்கள் பாதுகாப்பில் அண்ணனாக இருப்பேன், அரணாக இருப்பேன்' என்று வாய்கிழிய வசனம் பேசிய முதல்வர் எங்கே?
சென்னை வண்டலூர் அருகே அரசுப் பள்ளி மாணவி ஒருவரை, மர்ம நபர்கள் சிலர் பட்டப்பகலில் பள்ளி வளாகத்தில் இருந்தே கடத்திச் சென்று கூட்டுப் பாலியல் வன்கொடுமைக்கு ஆளாக்கிய சம்பவம் கடும் அதிர்ச்சியை ஏற்படுத்தியிருக்கிறது.
பெண்கள் பாதுகாப்பில் சமரசம் இல்லை என்று சொல்லிக் கொள்ளும் டம்மி முதல்வரின் சர்க்கஸ் ஆட்சியில், அரசுப் பள்ளி வளாகத்திலேயே பெண் பிள்ளைகளுக்குப் பாதுகாப்பு இல்லை என்பது வெட்கக்கேடு!
மதுராந்தகம் இடைத்தேர்தல் பிரச்சாரத்துக்காக முதல்வர் வருகிறார் என்பதற்காக, இந்தச் சம்பவத்தைக் காவல் துறையும் அதிகாரிகளும் மூடி மறைக்க முயற்சி செய்வதும், 'பாம்புக்கடி' என்று கூறி மடைமாற்றுவதும், தமிழ்நாடு எவ்வளவு மோசமானவர்கள் கைகளில் சிக்கியிருக்கிறது என்பதை வெளிச்சம் போட்டுக் காட்டுகிறது.
குற்றவாளிகளைப் பிடிக்க வக்கின்றி, பாதிக்கப்பட்ட பெற்றோரின் செல்போன்களைக் கைப்பற்றி, இச்சம்பவம் குறித்துப் பொதுவெளியில் பேசக் கூடாது என்று போலீஸ் தரப்பில் மிரட்டல் விடுப்பதாகவும் சொல்லப்படுகிறது.
இந்த ரீல்ஸ் ஆட்சியாளர்களின் அராஜகப் போக்கு, குற்றவாளிகளுக்குக் கூடுதல் தைரியத்தை அளிப்பதோடு, பாதிக்கப்பட்டவர்களை மேலும் சித்ரவதை செய்வது போல் இருக்கிறது.
இந்தச் சம்பவத்தில் பாதிக்கப்பட்ட மாணவிக்கு உரிய சிகிச்சை அளிப்பதோடு, அவருக்கு உரிய நீதி கிடைக்க வேண்டும்; குற்றவாளிகள் யாராக இருந்தாலும் அவர்கள் மீது மிகக் கடுமையான நடவடிக்கை எடுக்கப்பட வேண்டும்.
அரசுப் பள்ளி உள்ளிட்ட அனைத்துப் பள்ளி வளாகங்களிலும் பிள்ளைகளின் பாதுகாப்பை அரசு உடனடியாக உறுதி செய்ய வேண்டும். இடைத்தேர்தல் வருகிறது என்பதற்காக இந்தக் கொடுமையை மூடி மறைக்க முயற்சித்தால், மக்கள் இந்த ஆட்சியாளர்களின் முகத்தில் கரியைப் பூசுவது உறுதி!” என உதயநிதி ஸ்டாலின் தெரிவித்துள்ளார்.