ஐசிசி டெஸ்ட் பந்துவீச்சாளர்களுக்கான தரவரிசையில், ஆஸ்திரேலிய அணியின் வேகப்பந்து வீச்சாளர் மிட்செல் ஸ்டார்க் முதலிடத்தைப் பிடித்துள்ளார். இதன் மூலம் இந்திய அணியின் வேகப்பந்து வீச்சாளர் ஜஸ்பிரித் பும்ரா 2-ஆம் இடத்திற்குத் தள்ளப்பட்டுள்ளார்.
வங்கதேசத்திற்கு எதிரான டெஸ்ட் போட்டியில் மிட்செல் ஸ்டார்க் அபாரமாகப் பந்துவீசி மொத்தம் 10 விக்கெட்டுகளை வீழ்த்தினார். முதல் இன்னிங்ஸில் 6 விக்கெட்டுகளையும், இரண்டாவது இன்னிங்ஸில் 4 விக்கெட்டுகளையும் கைப்பற்றிய அவர், ஆஸ்திரேலிய அணியின் இன்னிங்ஸ் மற்றும் 51 ரன்கள் வித்தியாசத்திலான வெற்றிக்கு முக்கியக் காரணமாக அமைந்தார்.
இந்தச் சிறப்பான செயல்பாட்டின் மூலம் 872 தரவரிசைப் புள்ளிகளுடன் அவர் முதலிடத்திற்கு முன்னேறியுள்ளார். ஜஸ்பிரித் பும்ரா 862 புள்ளிகளுடன் 2-ஆம் இடத்திலும், நியூசிலாந்தின் மாட் ஹென்றி 861 புள்ளிகளுடன் 3-ஆம் இடத்திலும் உள்ளனர். 36 வயதான ஸ்டார்க், தனது 15 ஆண்டுகால டெஸ்ட் கிரிக்கெட் பயணத்தில் முதல்முறையாக முதலிடத்தைப் பிடித்துள்ளார் என்பது குறிப்பிடத்தக்கது.