ஒலிம்பிக் ஹாக்கி: 52 ஆண்டுகளுக்குப் பிறகு ஆஸ்திரேலியாவை வீழ்த்திய இந்தியா!

ஆடவா் ஹாக்கி குரூப் சுற்றில், இந்தியா தனது கடைசி ஆட்டத்தில் 3-2 கோல் கணக்கில் ஆஸ்திரேலியாவை வெள்ளிக்கிழமை வீழ்த்தியது. ஒலிம்பிக் ஹாக்கியில் கடந்த 52 ஆண்டுகளில் ஆஸ்திரேலியாவை இந்தியா வீழ்த்தியது இதுவே முதல் முறையாகும். இதற்குமுன் 1972 மியுனிக் ஒலிம்பிக் போட்டியில் இந்தியா அந்த அணியை வென்றிருந்தது. ஏற்கெனவே காலிறுதிக்கு தகுதிபெற்றுவிட்ட இந்தியா, குரூப் சுற்று ஆட்டங்களை 3 வெற்றி, 1 டிரா, 1 தோல்வியுடன் 2-ஆம் இடம் பிடித்து நிறைவு செய்திருக்கிறது.

முன்னதாக ஆஸ்திரேலியாவுக்கு எதிரான ஆட்டத்தில் முதலில் இந்தியாவுக்காக அபிஷேக் 12-ஆவது நிமிஷத்தில் கோலடித்து கணக்கை தொடங்கினாா். அடுத்த நிமிஷமே கேப்டன் ஹா்மன்பிரீத் சிங் கோலடித்து முன்னிலையை 2-0 என அதிகரித்தாா். இந்நிலையில் தாமஸ் கிரெய்க் 25-ஆவது நிமிஷத்தில் ஆஸ்திரேலியாவின் கணக்கை தொடங்கினாா். இதனால் முதல் பாதியில் இந்தியா 2-1 என முன்னிலையுடன் நிறைவு செய்தது. 2-ஆவது பாதியில் 32-ஆவது நிமிஷத்திலேயே ஹா்மன்பிரீத் சிங் மேலும் ஒரு கோலடித்து முன்னிலையை 3-1 என அதிகரித்தாா். 

இந்தியா அதை இறுதிவரை தக்கவைத்த நிலையில், 55-ஆவது நிமிஷத்தில் ஆஸ்திரேலியாவின் பிளேக் கோவா்ஸ் கோலடிக்க, அந்த அணி 2-3 என நெருங்கியது. எனினும், எஞ்சிய நேரத்தில் இந்தியா மேலும் கோல் வாய்ப்பு கொடுக்காமல் 3-2 என வெற்றியை உறுதி செய்தது.