மின்வாரியத்திற்கு ரூ.2.47 லட்சம் கோடி கடன்: வெள்ளை அறிக்கை வெளியிட்டார் அமைச்சர் நிர்மல் குமார்!

தமிழ்நாடு மின்சார வாரியத்திற்கு ஒட்டுமொத்தமாக 2.47 லட்சம் கோடி ரூபாய் கடன் இருப்பதாக, மின்துறையின் நிதிநிலை குறித்து வெளியிடப்பட்டுள்ள அதிகாரப்பூர்வ வெள்ளை அறிக்கையில் தெரிவிக்கப்பட்டுள்ளது.

சென்னை, ஜூன் 25: தமிழ்நாடு மின்சார வாரியத்தின் நிதி, செலவினங்கள் மற்றும் உள்கட்டமைப்பு உள்ளிட்ட விபரங்கள் அடங்கிய 2001-ஆம் ஆண்டு முதலான நிதிநிலை குறித்த வெள்ளை அறிக்கையை மின்துறை அமைச்சர் நிர்மல் குமார் இன்று வெளியிட்டார். இந்த அறிக்கையில் மின்வாரியத்தின் மனிதவளம், தளவாடப் பொருட்கள், வருவாய் மற்றும் செலவினங்கள் விரிவாகக் கூறப்பட்டுள்ளன. தற்போதைய நிலவரப்படி மின் துறைக்கு 34,447 கோடி ரூபாய் பற்றாக்குறை நிலவுவதாக அதில் குறிப்பிடப்பட்டுள்ளது.

காலிப் பணியிடங்கள் மற்றும் ஆட்சேபனை குற்றச்சாட்டு: வெள்ளை அறிக்கையின் விபரங்களை விளக்கிய அமைச்சர் நிர்மல் குமார், மின் துறையில் தற்போது ஒட்டுமொத்தமாக 65,921 காலிப் பணியிடங்கள் உள்ளதாகத் தெரிவித்தார். மேலும், கடந்த திமுக ஆட்சிக் காலத்தில் சரியாக 9,136 ஊழியர்கள் ஓய்வு பெற்றிருந்த நிலையில், வெறும் 343 பேர் மட்டுமே புதிய பணி நியமனம் செய்யப்பட்டுள்ளனர் என்ற விபரத்தையும் சுட்டிக்காட்டினார்.

கடந்த 2006-ஆம் ஆண்டில் மின் துறையின் நிதிப் பற்றாக்குறை 8,335 கோடியாக இருந்த நிலையில், தற்போது 2026-ஆம் ஆண்டில் அது 34,447 கோடி ரூபாயாக உயர்ந்துள்ளது. பிற மாநிலங்களுக்கு இடையேயான மின் பகிர்வு 4,248 மெகா வாட்டாக உள்ளது என்றும், கடந்த 2021 முதல் 2026 வரையிலான ஐந்தாண்டு காலகட்டத்தில் மட்டும் மின் துறைக்கு 87,399 கோடி ரூபாய் கடன் ஏற்பட்டுள்ளது என்றும் அமைச்சர் தெரிவித்தார்.