மாமன்றத்தில் த்ரிஷா படத்தை வைக்க வேண்டும் : சுயேச்சை கவுன்சிலர் கோரிக்கையால் பரபரப்பு

காரைக்குடி மாமன்றக் கூட்டத்தில் நடிகை த்ரிஷாவின் படத்தை வைக்க வேண்டும் எனச் சுயேச்சை கவுன்சிலர் கோரிக்கை விடுத்த சம்பவம் சலசலப்பை ஏற்படுத்தியுள்ளது.

சிவகங்கை மாவட்டம் காரைக்குடி மாநகராட்சியின் மாமன்றக் கூட்டம் இன்று காலை வழக்கம்போல் தொடங்கியது. கூட்டத்தில் உறுப்பினர்கள் தங்களது வார்டு கோரிக்கைகளை முன்வைத்து வந்தனர்.

அப்போது பேசிய 11-ஆவது வார்டு சுயேச்சை உறுப்பினர் மெய்யர், "மாமன்றக் கூட்டத்தில் நடிகை த்ரிஷாவின் படத்தை வைக்க வேண்டும். ஆட்சி மாற்றம் ஏற்பட்டு தவெக ஆட்சிக்கு வரக் காரணமே அவர்கள்தான். எனவே, அவர்களின் புகைப்படத்தை வைக்க வேண்டும். அடுத்த முதலமைச்சர் அவர்கள்தான்" எனக் கூறி முழக்கமிட்டார். த்ரிஷாவின் படத்தை ஏன் வைக்க வேண்டும் என மற்ற உறுப்பினர்கள் கேள்வி எழுப்பியதால், கூட்டத்தில் சிறிது நேரம் கடுமையான சலசலப்பு ஏற்பட்டது. இது தொடர்பான வீடியோ சமூக வலைதளங்களில் வேகமாகப் பரவி வருகிறது.

இதேபோல் இன்று காலை நடைபெற்ற சென்னை மாநகராட்சிக் கூட்டத்திலும் தவெக அரசுக்கு எதிராகப் புகார்கள் அடுக்கப்பட்டதால் பரபரப்பு நிலவியது. கூட்டத்தில் பேசிய மேயர், தவெக அரசின் மீது கடுமையான விமர்சனங்களை முன்வைத்ததுடன், மின்வெட்டுப் பிரச்சினையால் பொதுமக்கள் பெரும் அவதிக்குள்ளாகி வருவதாகவும், இதுதான் தவெக அரசின் சாதனையா என்றும் கேள்வி எழுப்பினார்.

இதனைத் தொடர்ந்து, திமுக உறுப்பினர்கள் தங்களது தலைவர்களைப் புகழ்ந்து பேசியதற்கு அதிமுக கவுன்சிலர் சதீஷ் எதிர்ப்பு தெரிவித்தார். மன்றத்தில் மக்கள் பிரச்சினைகளைப் பேசாமல் தலைவர்களைப் புகழ்ந்து நேரத்தை வீணடிப்பதாக அவர் குற்றம்சாட்டினார். இதற்குத் திமுக கவுன்சிலர்கள் குறுக்கிட்டு, "உங்களுக்குத்தான் தலைவர்களே கிடையாதே" எனக் கூற, இரு தரப்பினருக்கும் இடையே கடுமையான வாக்குவாதமும் மோதலும் வெடித்தது.