திமுக ஜென்-சி ஒருங்கிணைப்பாளரை நள்ளிரவில் கைது செய்ய முயற்சி: உதயநிதி, கனிமொழி கண்டனம்!

முதலமைச்சர் விஜய் குறித்து வீடியோ வெளியிட்ட விவகாரத்தில், திமுகவின் 'GenZ' குழு ஒருங்கிணைப்பாளர் அன்பானந்தன் அரியப்பனை நள்ளிரவில் போலீசார் கைது செய்ய முயன்ற சம்பவத்திற்கு கனிமொழி எம்பி கடும் கண்டனம் தெரிவித்துள்ளார்.

கிருஷ்ணகிரியில் வசித்து வரும் திமுகவின் 'GenZ' குழு ஒருங்கிணைப்பாளர் அன்பானந்தன் அரியப்பன், முதலமைச்சர் விஜய்யின் மகன் தனது தந்தையைக் தேடுவது போலவும், அவர் நடிகையுடன் பிறந்தநாள் கொண்டாட்டத்தில் இருந்தார் என்பது போலவும் நேற்று ஒரு வீடியோவை வெளியிட்டிருந்தார்.

இவ்வீடியோ வெளியானதைத் தொடர்ந்து, நேற்று நள்ளிரவில் அன்பானந்தன் அரியப்பனின் வீட்டுக்குள் நுழைந்த போலீசார் அவரைத் தேடினர். இதனால் அங்கிருந்த திமுகவினருக்கும் போலீசாருக்கும் இடையே கடுமையான வாக்குவாதம் ஏற்பட்டது. இதற்கிடையே, போலீசார் அவரை உடனடியாகக் கைது செய்யாமல் திரும்பச் சென்றுவிட்டதாகத் தகவல்கள் தெரிவிக்கின்றன.

இச்சம்பவம் குறித்துத் தூத்துக்குடி தொகுதி திமுக எம்பி கனிமொழி வெளியிட்டுள்ள அறிக்கையில், தங்களை எதிர்த்துக் கேள்வி கேட்கும் இளைஞர்களை அடக்கி ஒடுக்கலாம் என்று நினைக்கும் தவெக அரசுக்கு, விரைவில் தமிழ்நாட்டு இளைஞர்களே உரிய பதிலடி கொடுப்பார்கள் என்றும், நள்ளிரவில் வீடு புகுந்து கைது செய்ய முயன்ற காவல்துறையின் செயல் கண்டனத்திற்குரியது என்றும் குறிப்பிட்டுள்ளார்.

மறுபுறம், எதிர்க்கட்சித் தலைவரும் திமுக இளைஞரணி செயலாளருமான உதயநிதி ஸ்டாலின், திமுக சட்டத்துறையினருடன் அவசர ஆலோசனையில் ஈடுபட்டார். இவழக்கைச் சட்டரீதியாகக் கழகம் முறைப்படி எதிர்கொள்ளும் என அவர் அறிவுறுத்தியுள்ளார். மேலும், தவெக சட்டமன்ற உறுப்பினர் மீது அதே கட்சியின் பெண் கொடுத்த பாலியல் புகாருக்கு நடவடிக்கை எடுக்காத விஜய் அரசு, கேள்வி கேட்கும் இளைஞர்களை ஒடுக்க நினைப்பதாகத் திமுகவினர் குற்றம்சாட்டியுள்ளனர்.