தூத்துக்குடி அதிமுக நிர்வாகி தவெகவில் இணைந்தார்

தூத்துக்குடி மாவட்ட அதிமுக முக்கிய நிர்வாகியும், முன்னாள் அமைச்சரின் தீவிர விசுவாசியுமான ஆர்.சுதாகர் அதிமுகவில் இருந்து விலகி, தமிழக வெற்றிக் கழகத்தில் இணைந்துள்ளார்.

தூத்துக்குடி தெற்கு மாவட்ட அதிமுக செயலாளரும் முன்னாள் அமைச்சருமான எஸ்.பி. சண்முகநாதனின் தீவிர விசுவாசியான ஆர்.சுதாகர், தூத்துக்குடி மாவட்ட மத்திய கூட்டுறவு வங்கியின் முன்னாள் தலைவராகவும், அதிமுக அமைப்புசாரா ஓட்டுநரணி மாவட்டத் தலைவராகவும் பொறுப்பு வகித்து வந்தார். 

இந்நிலையில், அவர் அதிமுகவில் இருந்து விலகியுள்ளார். அவர், தவெக பொதுச்செயலாளரும் ஊரக வளர்ச்சி மற்றும் நீர்வளத்துறை அமைச்சருமான புஸ்ஸி ஆனந்த் முன்னிலையில் தமிழக வெற்றிக் கழகத்தில் தன்னை இணைத்துக் கொண்டார். இந்நிகழ்வின் போது முன்னாள் அமைச்சர் கடம்பூர் ராஜு, பி.திருச்சிற்றம்பலம் ஆகியோர் உடனிருந்தனர்.

கடந்த சட்டமன்றத் தேர்தலின் போது தூத்துக்குடி தொகுதியில் அதிமுக வேட்பாளராக ஆர்.சுதாகர் தான் போட்டியிடுவார் என்று அவரது ஆதரவாளர்களால் பெரிதும் எதிர்பார்க்கப்பட்டது. ஆனால், கடைசி நேரத்தில் திடீரென முன்னாள் அமைச்சர் சி.த. செல்லப்பாண்டியன் தூத்துக்குடி தொகுதி வேட்பாளராக அறிவிக்கப்பட்டார். இதனால் அதிமுக தலைமை மீது கடும் அதிருப்தியில் இருந்த சுதாகர், கட்சிப் பணிகளில் இருந்து சற்று ஒதுங்கியே இருந்தார். இந்த அதிருப்தியின் உச்சகட்டமாக தற்போது அவர் தவெகவில் இணைந்துள்ளார்.

தூத்துக்குடி மாவட்டம் முழுவதும் அதிமுகவின் முக்கிய நிர்வாகிகள் பலர் கட்சித் தலைமை மீது கடும் அதிருப்தியில் இருந்து வருவதாகக் கூறப்படுகிறது. இதனால் அவர்கள் அடுத்தடுத்து மாற்றுக் கட்சிகளில் இணையத் திட்டமிட்டு வருவதாக அரசியல் வட்டாரங்கள் தெரிவிக்கின்றன.