காங்கிரஸ் மூத்த தலைவர் என்டிஎஸ் சார்லஸ் தவெகவில் ஐக்கியம்!

காங்கிரஸ் இயக்கத்தில் பல்வேறு பொறுப்புகள் வகித்து வந்த மூத்த நிர்வாகி என்டிஎஸ் சாா்லஸ் தவெக பொதுச் செயலாளர் அமைச்சா் ஆனந்த முன்னிலையில் தவெகவில் இணைந்தார். 

தென் மாவட்டங்களில் 42 ஆண்டுகளுக்கும் மேலாகக் காங்கிரஸ் மற்றும் தமாகாவில் அங்கம் வகித்து, பல்வேறு உன்னதமான பொறுப்புகளை வகித்த மூத்த அரசியல் தலைவர் என்டிஎஸ் சார்லஸ், தமிழ் மாநில காங்கிரஸிலிருந்து விலகித் தமிழக வெற்றிக் கழகத்தின் பொதுச்செயலாளர் அமைச்சர் ஆனந்த் முன்னிலையில் கட்சியில் இணைந்துள்ளார்.

ஒருங்கிணைந்த நெல்லை மாவட்டக் காங்கிரஸ் செயலாளராகவும், மாநிலச் செயலாளராகவும் பணியாற்றி தென் மாவட்டங்களில் கட்சி வளர்ச்சிக்குக் கடும் உழைப்பை நல்கியவர். தமாகா தலைவர் ஜி.கே.வாசனுடன் மிகவும் நெருக்கமாக இருந்தவர். கடந்த 2024 நாடாளுமன்றத் தேர்தலில் தூத்துக்குடி தொகுதி தமாகா வேட்பாளராக இவருடைய பெயர் இறுதி செய்யப்பட்டு, கடைசி நிமிடத்தில் மாற்றம் பெற்றது.

தனது நீண்டகால அரசியல் பணிகளுக்காகச் சுமார் 500 ஏக்கர் பரப்பளவிலான சொந்தச் சொத்துக்களை விற்றுச் செலவிட்டுள்ளார் என்பது குறிப்பிடத்தக்கது. கட்சியில் இணைந்த சார்லஸ், தவெக அமைச்சர்கள் மற்றும் தூத்துக்குடி எம்.எல்.ஏ ஸ்ரீநாத் ஆகியோரைச் சந்தித்து வாழ்த்துப் பெற்றார். நீண்ட அரசியல் அனுபவம் கொண்ட இவருக்கு, வரவிருக்கும் உள்ளாட்சித் தேர்தலின் போது தூத்துக்குடி மாநகர அல்லது மாவட்ட உள்கட்டமைப்பில் மிக முக்கியப் பொறுப்புகள் வழங்கப்படும் எனத் தவெக வட்டாரத்தில் பேசப்படுகிறது.