கோடை விடுமுறையில் மாணவர்கள் பாதுகாப்பு : விழிப்புணர்வு ஏற்படுத்தக் கோரிக்கை!

பள்ளி விடுமுறை காலத்தை மாணவர்கள் பாதுகாப்பாகவும் பயனுள்ளதாகவும் கழிப்பதை உறுதி செய்ய மாவட்ட நிர்வாகம் மற்றும் காவல் துறை உரிய விழிப்புணர்வை ஏற்படுத்த வேண்டும் என குழந்தைகள் நல ஆர்வலர்கள் கோரிக்கை விடுத்துள்ளனர்.

தமிழகம் முழுவதும் ஆண்டு இறுதித் தேர்வுகள் முடிந்து பள்ளிகளுக்கு விடுமுறை அளிக்கப்பட்டுள்ளது. மாணவர்கள் தங்கள் வீடுகளிலும், உறவினர் வீடுகளிலும் விடுமுறையைக் கழித்து வருகின்றனர். இந்தச் சூழலில், மாணவர்கள் மற்றும் குழந்தைகளின் பாதுகாப்பினை உறுதி செய்ய மாவட்ட ஆட்சியர், மாவட்ட காவல் கண்காணிப்பாளர், மற்றும் குழந்தைகள் பாதுகாப்பு அலுவலர்களுக்குத் தூத்துக்குடி வழக்கறிஞர் சுப. மாடசாமி கடிதம் எழுதியுள்ளார்.

அதில், தட்டப்பாறையில் ஐடிஐ மாணவர் குளத்தில் மூழ்கி உயிரிழந்தது வேதனையளிக்கிறது. மாணவர்கள் நீர்நிலைகளில் குளிப்பதைத் தவிர்க்க வேண்டும். ஆழமான நீர்நிலைப் பகுதிகளில் உள்ளாட்சி நிர்வாகங்கள் எச்சரைப் பலகைகளை வைக்க வேண்டும். தற்போது வீசும் பலத்த சூறாவளி காற்றினால் மின்கம்பிகள் அறுந்து கிடக்க வாய்ப்புள்ளதால், அவற்றை மாணவர்கள் தொட வேண்டாம் என அறிவுறுத்த வேண்டும்.

மாணவர்கள் பெற்றோரின் இருசக்கர வாகனங்களை எடுத்துக்கொண்டு வேகமாகச் செல்வதைத் தவிர்க்க வேண்டும். விடுமுறை காலத்தில் மாணவர்கள் புத்தக வாசிப்பு, கணினிப் பயிற்சி மற்றும் ஆக்கப்பூர்வமான விளையாட்டுகளில் ஈடுபட மாவட்ட நிர்வாகம் ஊக்கப்படுத்த வேண்டும்.

காவல் துறை நடவடிக்கை: அனைத்து மகளிர் காவல் நிலைய அதிகாரிகள் தங்கள் எல்லைக்குட்பட்ட பகுதிகளில் குழந்தைகள் பாதுகாப்பு குறித்த விழிப்புணர்வை ஏற்படுத்த வேண்டும். மாணவர்களின் எதிர்கால நலன் கருதி, மாவட்ட நிர்வாகமும் குழந்தைகள் நல அமைப்புகளும் ஒருங்கிணைந்து இந்த ஆலோசனைகளைச் செயல்படுத்த வேண்டும் என வலியுறுத்தப்பட்டுள்ளது.