தூத்துக்குடியில் சூறாவளி காற்றுடன் திடீர் கனமழை : மின்மாற்றி வெடித்ததால் இருளில் மூழ்கிய நகரம்!

தூத்துக்குடியில் கடந்த சில வாரங்களாக நிலவி வந்த கடும் வெயிலுக்குப் பிறகு, நேற்று இரவு திடீரென வீசிய பலத்த சூறாவளி காற்று மற்றும் மழையினால் மின்தடை ஏற்பட்டு பல்வேறு பகுதிகள் இருளில் மூழ்கின. 

நேற்று காலை வெயிலின் தாக்கம் அதிகமாக இருந்த நிலையில், மாலை முதல் இதமான சூழல் நிலவியது. இரவு 9 மணி அளவில் திடீரென பலத்த சூறாவளி காற்று வீசத் தொடங்கியது. இதனால் சாலைகள் மற்றும் தெருக்களில் செம்மண் கலந்த புழுதி படர்ந்து காணப்பட்டது. வீடுகள், அலுவலகங்கள் மற்றும் கடைகளிலும் புழுதி படிந்ததால் மக்கள் சிரமத்திற்குள்ளாகினர்.

பலத்த காற்றினால் தூத்துக்குடி - ராமேஸ்வரம் சாலையில் வைக்கப்பட்டிருந்த இரும்பு தடுப்புகள் சரிந்து விழுந்தன. மேலும், கடைகளில் இருந்த விளம்பரப் பலகைகளும் காற்றால் தூக்கி வீசப்பட்டன. பாலவிநாயகர் கோவில் சாலை அருகே இருந்த மின்மாற்றி பலத்த காற்றினால் வெடித்து பழுதானது. இதனால் பாலவிநாயகர் சாலை, பாளையங்கோட்டை சாலை, எட்டயபுரம் சாலை உள்ளிட்ட சுற்றுவட்டாரப் பகுதிகள் மின்சாரமின்றி இருளில் மூழ்கின.

சூறாவளி காற்றைத் தொடர்ந்து இரவு 9.40 மணி அளவில் மழையும் பெய்யத் தொடங்கியது. சாலைகளில் மணல் குவியல் மற்றும் ஆங்காங்கே மரங்கள் விழுந்து கிடந்ததால், வாகன ஓட்டிகள் முகப்பு விளக்குகளை ஒளிரவிட்டபடி மெதுவாகச் செல்லும் நிலை ஏற்பட்டது. இதனால் நகரின் முக்கியச் சாலைகளில் போக்குவரத்து கடுமையாகப் பாதிக்கப்பட்டது.