வாட்ஸ்அப் கேஓய்சி செய்திகளை நம்ப வேண்டாம்: தமிழ்நாடு மெர்கன்டைல் வங்கி அறிவுறுத்தல்!

வாட்ஸ்அப் செயலியில் வரும் கேஓய்சி செய்திகளை நம்ப வேண்டாம் என்று வாடிக்கையாளர்களை தமிழ்நாடு மெர்கன்டைல் வங்கி அறிவுறுத்தியுள்ளது. 

சமீபகாலமாக TMB MBANK என்ற பெயரில், அடையாளம் தெரியாத எண்களிலிருந்து WhatsApp மற்றும் இதர குறுஞ்செய்தி செயலிகள் வழியாக "Urgent KYC Update” என்ற பெயரில் மோசடிச் செய்திகள் பரப்பப்பட்டு வருகின்றன. இது ஒரு திட்டமிட்ட சைபர் மோசடி (Cyber Fraud) என்பதால் வாடிக்கையாளர்கள் மிகுந்த எச்சரிக்கையுடன் இருக்குமாறு கேட்டுக்கொள்ளப்படுகிறார்கள்.

மோசடிக்காரர்கள், உங்கள் வங்கிக் கணக்கு முடக்கப்படும் என்று அச்சமூட்டி, "TMB MBank.apk” என்ற கோப்பை (File) பதிவிறக்கம் செய்யச் சொல்வார்கள். இந்தச் செயலியை உங்கள் மொபைலில் நிறுவினால் உங்கள் மொபைலை அவர்கள் தொலைவிலிருந்தே (Remote Access) இயக்க முடியும். உங்கள் OTP மற்றும் ரகசியத் தகவல்களை அவர்களால் கண்காணிக்க முடியும். உங்கள் அனுமதியின்றி உங்கள் வங்கிக் கணக்கிலிருந்து பணத்தைப் பறிக்க வாய்ப்புள்ளது.

அதிகாரப்பூர்வ தளம்: KYC புதுப்பிப்புகளை வங்கியின் நேரடிக் கிளைகள் அல்லது அதிகாரப்பூர்வ இணையதளமான https://www.tmb.bank.in/ மூலம் மட்டுமே மேற்கொள்ளவும்.

நம்பகமான பதிவிறக்கம்: வங்கிச் செயலிகளை Google Play Store அல்லது Apple App Store மூலம் மட்டுமே பதிவிறக்கம் செய்யவும்.

உறுதிப்படுத்துதல்: சந்தேகம் இருந்தால், உங்கள் வங்கி கிளையை அல்லது அதிகாரப்பூர்வ வாடிக்கையாளர் சேவை மையத்தை அணுகவும்.

உடனடிப் புகார்: உங்கள் கணக்கில் ஏதேனும் சந்தேகத்திற்கிடமான பரிவர்த்தனை நடந்தால், உடனடியாக வங்கியைத் தொடர்பு கொள்ளவும்.

APK கோப்புகள்: WhatsApp, SMS அல்லது மின்னஞ்சல் மூலம் வரும் எந்தவொரு .apk கோப்புகளையும் பதிவிறக்கம் செய்யவோ, நிறுவவோ வேண்டாம்.

சந்தேகத்திற்குரிய இணைப்புகள்: "உடனடி KYC" எனக் கூறி வரும் தெரியாத இணையதள இணைப்புகளை (Links) கிளிக் செய்ய வேண்டாம்.

ரகசியத் தகவல்: உங்கள் OTP, PIN, CVV, டெபிட்/கிரெடிட் கார்டு விவரங்கள் அல்லது இணைய வங்கி கடவுச்சொற்களை யாரிடமும் பகிர வேண்டாம்.

திரைப் பகிர்வு (Screen Sharing): முன்பின் தெரியாத நபர்களின் வழிகாட்டுதலின் பேரில் எவ்வித Screen-sharing செயலிகளையும் (உதாரணமாக: Anydesk, TeamViewer) நிறுவ வேண்டாம்.

டிஎம்பி வங்கி (TMB Bank) ஒருபோதும் WhatsApp மூலம் APK கோப்புகளை அனுப்பாது அல்லது அதிகாரப்பூர்வமற்ற செயலிகள் மூலம் KYC புதுப்பிக்கக் கோராது என்று வாடிக்கையாளர்களை வங்கி நிர்வாகம் அறிவுறுத்தியுள்ளது..