வாலிபர் வெட்டிக்கொலை: மர்ம நபர்கள் வெறிச்செயல்!

தூத்துக்குடி மாவட்டம், கோரம்பள்ளம் தெற்கு காலங்கரை கிராமத்தைச் சேர்ந்த ஊர்க்காவலன் என்பவரது மகன் பெரியநாயகம் (33). இவர் தனது குடும்பத்தினர் மற்றும் உறவினர்களுடன், குழந்தையின் மொட்டை மற்றும் காதுகுத்து விழாவிற்காக இருக்கன்குடி மாரியம்மன் கோவிலுக்குச் சென்றுள்ளார். அங்கு சாமி தரிசனம் முடித்துவிட்டு பெரியநாயகம் தனது டாடா ஏஸ் வாகனத்தில் குடும்பத்துடன் தூத்துக்குடி நோக்கித் திரும்பிக்கொண்டிருந்தார். 

எட்டையாபுரம் அருகே உள்ள கீழ ஈரால் கிராமத்தில் வாகனத்தைச் சாலையோரம் நிறுத்திவிட்டு அவர் அமர்ந்திருந்தார்.  அவரது குடும்பத்தினர் அருகில் உள்ள கடையில் இனிப்பு மற்றும் காரவகைகள் வாங்கச் சென்றிருந்தனர். அந்த நேரத்தில், மோட்டார் சைக்கிளில் வந்த இருவர், மறைத்து வைத்திருந்த அரிவாளால் பெரியநாயகத்தைச் சரமாரியாக வெட்டினர். இதில் ரத்த வெள்ளத்தில் சரிந்த அவர், சம்பவ இடத்திலேயே துடிதுடித்து உயிரிழந்தார். பட்டப்பகலில் மக்கள் நடமாட்டம் மிகுந்த பகுதியில் நடந்த இந்தத் தாக்குதலைக் கண்டு அங்கிருந்தவர்கள் அலறியடித்து ஓடினர். 

தனது மனைவி மற்றும் உறவினர்களின் கண் முன்னே பெரியநாயகம் கொல்லப்பட்ட சம்பவம் பெரும் சோகத்தை ஏற்படுத்தியது. தகவல் அறிந்து சம்பவ இடத்திற்கு வந்த எட்டையாபுரம் காவல்துறையினர், பெரியநாயகத்தின் உடலைக் கைப்பற்றிப் பிரேதப் பரிசோதனைக்காகத் தூத்துக்குடி அரசு மருத்துவமனைக்கு அனுப்பி வைத்தனர். இது தொடர்பாக வழக்குப் பதிவு செய்துள்ள போலீசார், தலைமறைவாக உள்ள முனியசாமி மற்றும் அவரது நண்பர் ஆகிய இருவரையும் தீவிரமாகத் தேடி வருகின்றனர். இந்தக் கொலைச் சம்பவம் அப்பகுதியில் பெரும் பரபரப்பை ஏற்படுத்தியுள்ளது.