தூத்துக்குடியில் 3 கோஷ்டிகளாக தவெக ஆர்ப்பாட்டம்!

தூத்துக்குடியில் நடிகர் விஜய்யின் தமிழக வெற்றி கழகம் கட்சிக்கு இதுவரை மாவட்ட செயலாளர் நியமிக்கப்படவில்லை. மாவட்டச் செயலாளர் பதவியை குறிவைத்து தூத்துக்குடியில் மாவட்ட பொறுப்பாளர்கள் அஜிதா, சாம்  முன்னாள் அரிமா சங்க ஆளுநர் முருகன் என மூன்று கோஷ்டியாக கட்சியினர் செயல்பட்டு வருகின்றனர். 

இந்நிலையில் நேற்று தூத்துக்குடியில் வக்ஃப் வாரிய சட்ட திருத்த மசோதாவை கண்டித்து தமிழக வெற்றிக்கழகம் சார்பில் தூத்துக்குடியில் கண்டன ஆர்ப்பாட்டம் நடைபெற்றது.  முன்னாள் அரிமா சங்க ஆளுநர் முருகன் தலைமையில், மாவட்ட பொறுப்பாளர்கள் அஜிதா மற்றும் சாம் ஆகியோர் தலைமையில் என மொத்தம் மூன்று கோஷ்டிகளாக ஒரே இடத்தில் சில மணி நேரம் இடைவெளி விட்டு விட்டு மூன்று கோஷ்டியும் தனித்தனியாக ஆர்ப்பாட்டம் செய்தனர்.

தூத்துக்குடிக்கு மாவட்ட செயலாளர் நியமிக்க முடியாமல் தமிழக வெற்றி கழக தலைமை திணறி வருவதாகவும், கட்சி தொடங்கி ஒரு தேர்தலை சந்திப்பதற்கு முன்பே இத்தனை கோஷ்டியா? என்று அரசியல் வட்டாரத்தில் விமர்சனம் எழுந்துள்ளது.