அமெரிக்காவில் புத்தாண்டு கொண்டாட்டத்தில் தீவிரவாத தாக்குதல் : 15 பேர் உயிரிழப்பு

அமெரிக்காவில் புத்தாண்டு கொண்டாட்டத்தின் போது மக்கள் கூட்டத்துக்குள் வாகனம் புகுந்ததில் 15 பேர் உயிரிழந்தனர். இந்த தாக்குதலில் ஈடுபட்டவருக்கு ஐஎஸ்ஐஎஸ் பயங்கரவாத அமைப்புடன் தொடர்பு இருப்பது விசாரணையில் உறுதியாகியுள்ளது.

அமெரிக்காவின் லூசியானா மாகாணத்தில் நேற்று பல இடங்களில் புத்தாண்டு கொண்டாட்டம் நடந்தது. அங்குள்ள சுற்றுலா நகரான நியூ ஆர்லியன்சில் புத்தாண்டு கொண்டாட்டத்திற்கு புகழ்பெற்ற இடமான போர்பான் தெருவில் ஆயிரக்கணக்கானவர்கள் திரண்டு இருந்தனர். நள்ளிரவில் ஒரு கார், எதிர்பாராதவிதமாக புத்தாண்டு கொண்டாட்ட கூட்டத்தில் புகுந்தது. ஏராளமானவர்கள் மீது கார் மோதியது. 

இதில் 15 பேர் சம்பவ இடத்திலேயே பலியானார்கள். மேலும் பலர் காயம் அடைந்தனர். அடைந்தவர்களை மீட்டு அருகில் உள்ள 5 மருத்துவமனைகளில் சிகிச்சைக்காக சேர்த்து உள்ளனர்.  தாக்குதல் நடத்திய காரில் ஐஎஸ்ஐஎஸ் பயங்கரவாதக் கொடி பறந்ததாகக் கூறப்படுவதால் பதற்றம் நிலவுகிறது. மேலும், தாக்குதலில் ஈடுபட்டது சம்சத் தின் ஜபார் என அடையாளம் காணப்பட்டுள்ளது. அவர் அமெரிக்க முன்னாள் ராணுவ வீரர் என்பதும், ஆப்கானிஸ்தானில் ராணுவப் பணியில் இருந்தவர் என்பதும் முதற்கட்ட விசாரணையில் என்று தெரியவந்துள்ளது. 

அது மட்டுமட்டலாது வாகனத்தில் ஐஎஸ்ஐஎஸ் பயங்கரவாத அமைப்பின் கொடியும் இருந்தது. வாகனத்தில் இருந்து துப்பாக்கிகள் கைப்பற்றப்பட்டுள்ளன. அந்த நபர் நிச்சயமாக இத்தாக்குதலை தனியாக செய்திருக்க வாய்ப்பில்லை. இவருக்குப் பின்னணியில் இரண்டு பேர் இருந்துள்ளனர் என அமெரிக்க புலனாய்வு நிறுவனமான எஃப்பிஐ சந்தேகிக்கிறது. அதனால் தீவிரவாத தாக்குதல் என்ற கோணத்திலேயே இந்த சம்பவத்தை எஃப்பிஐ விசாரிக்கிறது. ஜெர்மனியில் கிறிஸ்துமஸ் கொண்டாட்டத்தில் வாகனம் புகுந்ததில் 5 பேர் கொல்லப்பட்டனர். சுமார் 200 பேர் காயம் அடைந்தது குறிப்பிடத்தக்கது.