தூத்துக்குடி மாவட்டம் அம்மன்புரம் வடக்குத் தெருவைச் சேர்ந்தவர் பீட்டர் (48). இவர் தமிழக வெற்றி கழகத்தின் நிர்வாகியாகப் பணியாற்றி வருகிறார். இவருக்கும் இவரது வீட்டின் பின்புறம் வசிக்கும் முன்னாள் ஊராட்சி மன்றத் தலைவர் ஞானராஜ் என்பவருக்கும் இடையே நிலம் தொடர்பான பிரச்சனை இருந்து வந்துள்ளது. இதனால் இரு தரப்பினருக்கும் இடையே முன்விரோதம் நிலவி வந்தது.
சம்பவத்தன்று பீட்டர் அம்மன்புரம் தேவாலயம் அருகே தனது இருசக்கர வாகனத்தில் வந்துகொண்டிருந்தார். அப்போது ஞானராஜின் தம்பி மகன் ஆல்வின், முன்னாள் ஊராட்சி மன்றத் தலைவர் ஞானராஜ் உட்பட 6 பேர் கொண்ட கும்பல் பீட்டரை வழிமறித்துத் தகாத வார்த்தைகளால் பேசித் தாக்குதல் நடத்திவிட்டுத் தப்பிச் சென்றனர்.
இச் சம்பவம் குறித்துப் பீட்டர் அளித்த புகாரின் பேரில் குரும்பூர் காவல் நிலைய போலீசார் வழக்குப்பதிவு செய்து தீவிர விசாரணை நடத்தினர். விசாரணையில், பீட்டரைத் தாக்கிய ஸ்ரீவைகுண்டம் அருகே உள்ள அனியபாராநல்லூரைச் சேர்ந்த பொன்ராஜ் மகன் முத்துப்பாண்டி (21) மற்றும் பண்டாரவிளையைச் சேர்ந்த பட்டுராஜ் மகன் செந்தில்ராஜன் (19) ஆகிய 2 பேரைக் காவல்துறையினர் கைது செய்தனர். மேலும் தப்பியோடிய ஆல்வின், ஞானராஜ் உள்ளிட்ட மற்ற நபர்களைப் போலீசார் தீவிரமாகத் தேடி வருகின்றனர்.