இளநிலை மருத்துவப் படிப்புகளுக்கான 'நீட்' வினாத்தாள் கசிந்த விவகாரத்தில், அப்போதைய மத்திய கல்வி அமைச்சர் தர்மேந்திர பிரதான் ராஜினாமா செய்ய வலியுறுத்தி டெல்லி ஜந்தர் மந்தர் உள்ளிட்ட நாட்டின் பல்வேறு பகுதிகளில் மாணவர்கள் தொடர் போராட்டங்களில் ஈடுபட்டனர்.
போராட்டம் தீவிரமடைந்ததைத் தொடர்ந்து மத்திய அமைச்சர் ராஜினாமா செய்தார். சில இடங்களில் நடைபெற்ற அசம்பாவிதங்கள் காரணமாகப் போராட்டத்தில் ஈடுபட்ட மாணவர்கள் மீது பல்வேறு மாநிலங்களில் வழக்குகள் பதிவு செய்யப்பட்டன.
மாணவர்கள் மீதான வழக்குகளை ரத்து செய்ய வேண்டும் என்று தலைமை நீதிபதி சூர்யகாந்த் ஏற்கனவே அறிவுறுத்தியிருந்த நிலையில், மத்திய அரசின் சார்பில் உச்ச நீதிமன்றத்தில் மனு தாக்கல் செய்யப்பட்டது. அதில், "மாணவர்களின் எதிர்காலத்தைக் கருத்தில் கொண்டு, அரசியலமைப்புச் சட்டப் பிரிவு 142-ன் கீழ் உச்ச நீதிமன்றத்திற்கு உள்ள சிறப்பு அதிகாரத்தைப் பயன்படுத்தி மாணவர்கள் மீதான வழக்குகளை ரத்து செய்ய வேண்டும்" எனச் சொலிசிட்டர் ஜெனரல் துஷார் மேத்தா வலியுறுத்தினார்.
இம்மனுவை அவசரமாக விசாரித்த தலைமை நீதிபதி சூர்யகாந்த், நீதிபதிகள் ஜாய்மால்யா பாக்சி, வி. மோகனா ஆகியோர் அடங்கிய அமர்வு இன்று (செப்டம்பர் 1) தீர்ப்பளித்தது. கடந்த ஜூலை 20 முதல் ஜூலை 25 வரை நடைபெற்ற மாணவர் போராட்டங்கள் தொடர்பாக நாடு முழுவதிலும் உள்ள எந்தவொரு மாநிலம் அல்லது யூனியன் பிரதேசத்தில் பதிவு செய்யப்பட்ட வழக்குகளையும் ரத்து செய்து நீதிபதிகள் உத்தரவிட்டனர்.
பீகார், மேற்குவங்கம், அசாம், மகாராஷ்டிரா ஆகிய மாநிலங்கள் மட்டுமே மனுத் தாக்கல் செய்திருந்த போதிலும், மாணவர்களின் எதிர்கால நலனைக் கருதி நாடு முழுமைக்குமான அனைத்து வழக்குகளையும் ரத்து செய்வதாக நீதிபதிகள் விளக்கமளித்தனர்.
இருப்பினும், கடுமையான குற்றப் பின்னணி கொண்ட நபர்களைக் கருத்தில் கொண்டு, ஜந்தர் மந்தர் போராட்டத்தில் பங்கேற்ற 2,873 நபர்கள் மீது மட்டும் முதல் தகவல் அறிக்கை (FIR) பதிவு செய்ய டெல்லி காவல்துறையினருக்கு உச்ச நீதிமன்றம் அனுமதி அளித்துள்ளது.